王浩信買三千萬豪宅：全部血汗錢！
視帝王浩信終於處男下海「上車」買樓成為業主，以三千多萬元買下清水灣一個近二千呎的單位，浩信坦言全都是血汗錢；而周柏豪亦購入同一樓盤氹老婆！
無綫藝人王浩信近年不斷拍劇，演技備受讚賞，更榮升視帝，自此登台、接Job陸續不斷。而之前坦言有意買獨立屋送給太太陳自瑤的他，剛以3,306.6萬港元購入清水灣傲瀧11座一個高層單位，該單位實用面積為1,837呎，浩信坦言是次購入單位乃給母親及家人自住。
新劇打到飛起
浩信接受電話訪問時坦言為「上車」儲了很耐錢，更笑言全是血汗錢，問到何時看中單位時，他說：「上星期睇嘅！（同埋媽咪、老婆去？）老婆去咗杜拜拍嘢，淨係我同媽咪去睇，不過媽咪好鍾意，所以決定扑槌買。」問到之前不是說要買獨立屋？浩信即說：「嘩！嗰啲遲兩步先，仲要努力搵錢。」他又坦言今次是自己第一次正式做業主：「好彩有屋企人幫手。」
為了達成心願買獨立屋給老婆，浩信要繼續拚搏搵銀，他透露之後會開拍監製劉家豪一套新劇，更要動作連場，打到飛起！即使有多年拍動作戲經驗，浩信現時都要接受公司安排的一連串動作訓練，他笑說：「所以啲錢搵嚟全部都有血汗O架！要買豪華獨立屋，真係命都攞埋出嚟！」
Pakho送樓畀老婆
此外，有傳周柏豪（Pakho）亦購入此樓盤，他昨晚透過經理人承認：「開心嘅！（咁大手筆？）送畀老婆嘅禮物，當係結婚周年紀念禮物又好，或者佢生日都好，咁多年來太太喺背後真係好支持我嘅。」
文：影視組