未婚妻怕醜避鏡頭 韋家雄Man爆拖實
無綫「綠葉王」韋家雄日前與未婚妻Keynes到西貢拍拖，巧遇帶貓咪睇醫生的唐詩詠，期間發現記者，怕醜的Keynes即掉頭走，躲在男友身後，韋家雄即護「妻」拖到實，Man到爆。
52歲的韋家雄情路坎坷，廿歲出頭時與前妻奉子成婚，最終離婚收場，直至前年他與藝人陳嘉嘉相戀，不過有指女方父母嫌他年紀大，拍拖三年便分手。今年初他突然在社交網放閃，上載與圈外女友Keynes的啜爆甜蜜照片，將戀情公告天下。
一支汽水兩份飲
雖然韋家雄與女友年齡相差近廿年，但無損感情發展，二人拍拖至今僅數月，已計劃今年內拉埋天窗。日前下午3時許，仍處於熱戀期的兩人，到西貢拍拖行街撐枱腳。醫肚後，他們十指緊扣在附近閒逛，期間未婚妻嗌口渴，韋家雄即拖她到便利店買汽水，一支汽水兩份飲，認真Sweet。
兩人邊行邊傾，突然遇見帶貓咪去睇醫生的唐詩詠，韋家雄即介紹Keynes給詩詠認識，三人站在街頭寒暄幾句後，孭住寵物背囊的詩詠先行離開。怕醜的Keynes發現有記者，顯得有點不知所措，即掉頭走，躲在未婚夫身後，韋家雄見狀挺身護「妻」，拖住Keynes大方讓記者拍照。問到婚禮籌備進度？他說：「七七八八啦。」向來駕駛電單車的他被問是否有了小朋友才換私家車？他表示：「唔係，係佢（未婚妻）唔鍾意坐電單車。」身旁的Keynes即尷尬地說：「肥咗啫。」之後二人往取車離開。
文、攝：追蹤組