林凱恩品學不兼優瞓出名堂

前港姐林凱恩自小住在將軍澳區，小學、中學也在區內就讀，令她養成了「生死時速」的壞習慣，她笑言：「因為我屋企住得近嘅關係，所以我每朝都好努力等到最後一秒先趕返學校，非常準時！」除了日日瀕臨遲到外，她更因「愛瞓覺」而聞名，她說：「我嗰陣次次上堂都會瞓覺，仲瞓到出晒名，個個老師、同學都知！」

用Locker做生意

講到劇中的Bonnie經常捱夜做Project，林凱恩指現實中的她卻完全相反，她說：「我都勤力嘅，不過就唔係花喺讀書上。以前大家都好懶落小食部買嘢食，咁我就利用班房Locker搞咗檔小生意，用批發價買定大量紙包飲品放入Locker，再用零售價賣畀其他同學，從中賺取差額。」她續指當時生意雖好，但亦偶有損失：「我嗰陣好大頭蝦，成日都唔記得鎖Locker，所以經常唔見咗幾包嘢飲，但都冇所謂嘅，最緊要同學開心。」

林凱恩自爆每次行經籃球場，都有男同學碌個波去其腳邊。	林凱恩難得重返母校，師妹都爭相集郵。	每逢踏入冬季，林凱恩都獲有心人送上熱牛奶暖身。

籃球場碌波搭訕

雖然林凱恩中學時並非「風頭躉」，卻意外引起男同學的關注，她說：「我嗰陣係插班生，其他同學都對我比較好奇，所以當我朝早經過籃球場嘅時候，啲男仔會特登碌個波去我腳邊，睇吓我有咩反應。」

經歷最後一屆會考同高考的林凱恩，與同學間感情要好。	林凱恩運用小聰明，在班房開檔賣嘢飲。	放大圖片

寒冬送奶多人撩

貴為港姐出身，林凱恩讀書時已充滿魅力，更獲男同學暗中照顧，她憶述：「一到冬天，我每日就會着住大褸、戴住頸巾返學，所以大家都知我好怕凍。嗰陣差唔多每一日，我個櫃桶都會出現一包暖嘅牛奶，雖然冇寫低係邊個送，不過當時都有啲男仔對我特別好，晚晚打電話畀我，所以我都大概估到係邊個，其實依家諗番都幾Sweet（口架）！」

用燒賣砌蛋糕

除了吸引不少男同學獻殷勤外，林凱恩中學時亦有一大班姊妹，難怪她選港姐時能奪得「友誼小姐」的獎項。她大爆讀書時的難忘事：「我同啲朋友因為一齊經歷最後一屆會考同高考，所以感情非常好。年年有同學生日，大家都會約埋一齊大搞！我仲好記得我特別錫一個同我同名嘅女仔，有次我哋夾埋一齊畀個任務佢，叫佢完成晒所有指令，最後就見到我哋悉心為佢準備嘅蛋糕！」她笑言曾用燒賣砌成蛋糕送給朋友，雖然簡單，卻是最獨一無二的禮物。

後記：極速入屋嗌感恩

林凱恩踏入娛樂圈後默默耕耘，終於在第一部演出的處境劇《愛˙回家之開心速遞》中成功突圍而出，其「Bonnie」一角深入民心。回到校園，不少師妹都把她認出，還直呼其角色Bonnie的名字，同學們得知她是師姐都喜出望外，要求合照。感性的她在鏡頭滿帶笑容，但鏡頭後則帶點感觸，她解釋因感到自己相當幸運，能夠遇到一個很好的機會，在劇中的發揮能讓大家認得她。但感觸過後，她又很快回復Happy Girl狀態，繼續施展活潑一面進行拍攝，十分專業。

文：專案組