唐詩詠唔恨攞視后：我想嫁呀!
榮升視后的唐詩詠，昨日出席活動時聲稱享受單身，但她被祝賀再攞視后時，竟然表示寧願嫁人都唔要獎！
藝人袁偉豪（Ben）、唐詩詠、朱晨麗、賴慰玲及趙希洛等昨日到鑽石山宣傳無綫劇《棟仁的時光》，詩詠身穿露腰裝大晒小蠻腰搶鏡！日前37歲生日的詩詠表示，已吃了七個蛋糕。問Ben有何表示？他笑說：「送麥皮畀佢清吓腸胃！一係幫佢揀個男朋友囉！（你身邊好多筍盤？）最筍嗰個（指住自己）都冇喇！其實緣分要嚟擋都擋唔住，或者享受吓單身先。」
享受單拖出遊
詩詠則表示不急拍拖，最近亦沒有留意是否有追求者：「其實黃翠如話介紹男仔，一年都冇介紹到，唔緊要，依家做自己想做嘅事先，例如一個人去旅行。（想有艷遇？）又唔好，好似危險咗啲，都係想搵番本地人。」資深演員煒烈在台上大讚詩詠演技出色，並祝她奪多幾次視后，但詩詠搞笑說：「我想嫁呀！」竟然開到口恨嫁！
朱晨麗冇P圖
朱晨麗日前在網上甫泳裝相晒Fit爆身材，吸引大批網民狂讚，她笑說：「選美後冇乜甫泳衣相，遊船河都係着Tee，今次係同蔚雨芯去峇里旅行。（覺得好Fit所以大解放？）一直操緊，但未係最Fit，不過好開心回響OK，多謝網友欣賞。（甫多啲泳衣相？）哈！等多十年喇！或者睇心情，睇吓有冇需要。（腰咁幼有冇P圖？）我不嬲幼，之前仲幼得23吋，依家24吋。」為新劇《多功能老婆》剪短頭髮的朱晨麗，直言新髮型更清爽及年輕。
文：影視組