琦琦幫女兒推Job冇手軟
影帝任達華與太太琦琦及馬詩慧昨日為時裝店剪綵，琦琦透露與品牌老闆是好友，不為酬勞，任達華更專程由中山撐老婆，笑言自己要做「Yes Man」，老婆、外母或女兒想買嘢都只Say Yes。
女兒任晴佳早前拍攝一輯靚相，問到是否不介意女兒入行？琦琦說：「佢好鍾意時裝設計，好多時都帶佢去睇時裝，算半隻腳入咗時裝呢行。（幫佢接廣告或行時裝騷？）睇吓邊類型廣告，其他都唔會，佢只係13歲！（係咪推咗好多job？）都好多，啲真人騷都推晒。」任達華亦指不是錢的問題：「佢仲細，暫時唔考慮住。」
提到任達華於近期熱播劇《冒險王衛斯理》飾演白老大，由原著的青幫頭目變成國際刑警，他表示無所謂，最開心網民讚髮型有型。