陳家樂太爺多情 靚湯翻生做小生
藝人陳家樂因劇集帶挈而獲封男神，日前他被發現現身街頭測試人氣，獲大批戲迷包圍及集郵。家樂伺機向無綫「獻媚」，明言不介意「再下一城」！而本周劇情將交代他與林夏薇戀情升溫，豈料「亡妻」湯洛雯突然現身！
家樂因接拍無綫劇《逆緣》人氣急升，他與林夏薇在餘下十集戲愛到難捨難離，不過一對小情人最終未能同偕白首，薇薇形容這段戀情是「半Happy Ending」。據悉，劇情於周一開始漸趨白熱化，奸角陳山聰本派車撞家樂，豈料撞死薇薇養母韓馬利，家樂於是許下諾言，照顧薇薇一生一世。奈何一個疑似家樂「亡妻」湯洛雯（靚湯）的「第三者」突然出現，令二人戀情翻暗湧！當被追問「半Happy Ending」究竟是指甚麼？薇薇受訪時大賣關子：「咁要大家追睇喇！」
拍劇入屋想再添食
劇中榮升「太爺」級的家樂，日前應無綫《東張西望》之邀，到銅鑼灣測試人氣，家樂相當「吸客」，男女老少都爭取機會與他合照。談到升呢當男神，他笑說：「落到銅鑼灣，我都擔心有冇人認得出我，好彩大家嘅反應好正面，除咗太太、少女，連男性觀眾都停低搵我傾偈，最感動係撞到個粉絲講得出我點出道、拍過乜戲等。拍劇真係好入屋，如果無綫再搵我，我一定會考慮！」
頹Look落樓冇形象
另外，家樂接受電台主持人梁泰來訪問，笑言不是偶像派：「我落樓會踢拖、着短褲、唔洗頭，拍拖亦冇諗過隱瞞，我視女友為結婚對象。」家樂直言曾對演戲過份自信，在拍攝電影《很想和你在一起》時，忽視導演意見，結果效果奇差。這部戲後，他被雪藏了好幾年，直至遇上麥曦茵導演，才能重新出發。參加新秀歌唱比賽入行的他，自爆當年英皇重組Sun Boy'ｚ時，他亦在候選名單之列，但最終上了幾堂跳舞課便決定放棄：「因為我跳到成隻蟹咁！」至於今日31歲生日的靚湯，日前獲一班圈中好友為她舉行生日派對，席間一口氣切足3個蛋糕。
文：影視組