亞視續泵水擬10億起劇場

亞視「熄機」一年半後，今年1月底以OTT網絡電視「復活」，至今不足半年卻傳出「大地震」。昨日有報道指亞視老闆見發展不如理想不再泵水，將行政總裁吳雨和營運總裁區偉林兩個職位剔除，轉做顧問，就連製作總監林嘉穎亦遞信請辭。

顧問身份不變

亞視投資者鄧俊杰昨日被問及此事，指傳聞是無中生有，他強調會繼續注資亞視，並在馬六甲投資10億興建劇場：「亞視好重用吳雨、區偉林，所以要澄清佢哋唔係削權，亦冇地震！我哋仲傾緊今年大計，會有三、四套劇開拍，會辦亞姐，又同深圳合作拍處境劇等！（馬六甲開劇場？）會投資10億喺當地開劇場，有酒店、商場配套，遲啲會安排亞視藝人去宣傳！」

吳雨亦澄清和區偉林職位沒有改變，當初他倆與亞視簽約，身份都是高級顧問，由於開台關係兼任行政總裁及營運總裁，方便處理招聘人手埋班，吳雨說：「依家開台3個月，一切已上軌道，所以我哋兩個做番原職，亞視有乜嘢需要，我哋都會提供意見，執行就會交畀新管理層。（員工唔協調？）公司係一家人，我哋集合咗無綫、前亞視、有線、now等出嚟嘅員工，唔存在磨合問題，我都仲要繼續耕田！（製作總監林嘉穎辭職？）佢舊年已遞信，因為身體有問題，而製作上工作，同樣係高級顧問嘅何麗全可以幫手！」

朱慧敏指在亞視工作很開心。	亞視傳出大地震，營運總裁區偉林（左起）、投資者鄧俊杰、行政總裁吳雨及外事部總監曾醒明齊闢謠。	朱慧珊唔信亞視有問題。

每月28號必出糧

區偉林更向亞視員工派定心丸，每月28號前一定出糧：「從來冇缺糧，我唔想發生以前啲遺憾嘅事！」另外，林嘉穎昨日回覆表示：「我係應承吳雨幫手Set Up個Team就功成身退。（身體有問題？）我右腳關節上落樓梯有啲痛，每星期要做物理治療兩個鐘，亞視順利開台後，我都想停一停休息吓！」

至於有份主持節目《今晚見》的朱慧敏，表示亞視復播3個月已有不錯的成績，台前幕後上下一心，工作很開心，未聞幕後有任何不和傳聞。而她與亞視合作自由度大，可以到其他電視台做主持及拍劇，故對她不會有任何影響。為亞視效力多年的朱慧珊亦說：「我從來冇懷疑老闆唔注資，老闆講計劃多多，可能節目上會有變動，相信點變亞視都冇問題嘅！」

文：影視組