陳慧琳勸黎明睇開啲預咗畀人影！

張家輝自導自演新片《低壓槽》前晚於九龍灣舉行首映禮，除了戲中演員張可頤、苗僑偉及張繼聰外，一班好友張學友、陳慧琳亦有到場力撐，其中Kelly以透視裝晒長腿，她笑說：「夏天嘛！我重點係長腿同對鞋，但家輝竟然問我做乜帶兩隻狗嚟，其實啲羽毛係翼。」

提到好友黎明誕女，Kelly表示仍未見過B女：「我都唔八卦，不過BB喎，我當然想睇啦！見到面會問問佢。（傾吓育兒話題？）冇喎！但都希望佢有心理準備畀人影，我都明佢心情，當時我生第一胎，都覺得好似畀人包圍咗間醫院，抖唔到氣，但都要慢慢適應，小朋友好快大個要返學，就算冇記者都有家長影你，避唔到。我早排都畀人影咗，係記者定家長我都唔識分。」她指出門最重要是打扮整齊，就不怕被影到。

苗僑偉張家輝做「老襟」？

家輝獲正在做內地巡迴演唱會的「異父異母兄弟」學友抽空來支持，他笑言沒想到對方會來，談到會否傾合作？他笑說：「佢邊得呀，巡迴幾年好似行咇咁！」而學友表示睇過預告，大讚家輝有進步，現在連說話都有「導演腔」：「依家用導演身份講嘢係唔同晒！以前講嘢好似我咁冇乜Point，依家有風格又正經，搞到我都有啲驚，想叫聲大佬！」家輝聞言笑說：「唔使驚呀細佬！」最近家輝被網友取了外號「渣渣輝」，他笑言不介意，問到是否有藉口不學好普通話？他笑說：「我忠於自己，比較反叛啲！（下次拍戲預埋太太關詠荷？）機會比較微，因為屋企要有人睇住，我就自私啲唔畀佢拍！」

放大圖片	學友特登捧張家輝場，「兩兄弟」搭晒膊頭有講有笑。	張可頤翹實「兩任老公」苗僑偉（左）及張家輝。

而張可頤自爆苗僑偉與張家輝都演過她老公，難得拖住「兩任老公」同場當然要影合照，家輝即搞笑說：「嘩，老襟？」即被張可頤取笑思想污穢。問會揀哪位老公？她笑言各有各出色，家輝搶答：「佢想要反叛咪搵我囉！想穩重嘅咪搵三哥！」

文：影視組