首次執導電影 克勤唔敢演驚影響票房
歌手李克勤昨日出席電台訪問，他稱現時每逢五、六、日都會到內地進行商演，周一至四就做歌曲宣傳。豈不是沒有當爸爸的時間？他笑說：「朝早6、7點就係送返學，陪踢波或者簽名畀零用時間。」談到新歌《單身狗》，他稱是今年唯一一首廣東歌，是講男女分手，歌詞會有指甲鉗、恐怖片、瑜伽、亂葬崗，讓歌迷易記。
另外，他原先有計劃今年開戲，現要延後：「趕唔切呀，依家寫緊劇本，已經有故事大綱，會集合唔同層面嘅Writer去寫，想講一個現代人嘅故事。」這部電影是他自編自導，問到為何不自演？他坦言：「唔演啦！無謂喇！唔好影響個票房。楊生（楊受成）都冇限我Budget，我目標唔好蝕就得。（第一次執導？）係呀，希望唔係最後一次！（你可以提名最佳新導演？）虛名嚟嘅啫！呢啲嘢隨緣啦，第一步都未開始，就唔好諗咁遠，做人唔好好高騖遠，做好本分先。 」