欣宜淚崩紅館側田未唱完被催落台

一連兩場鄭欣宜處女紅館騷前晚完美落幕，爸爸鄭少秋撐足兩晚場，亦有大批圈中好友支持，包括汪明荃、薛家燕、周秀娜、彭秀慧、AGA及Gin Lee等，星光熠熠。欣宜甫開場為粉絲帶來一連串勁歌熱舞，High爆將黑色帽拋落台，惹來粉絲尖叫！

除固定嘉賓Supper Moment外，尾場邀請到側田上台獻聲，二人一見面就來個擁抱，之後再合唱《好人》。側田坦言一直非常欣賞欣宜的台風，其後欣宜落台換衫，留下側田演唱《男人KTV》，惟最後連歌都未唱完就被工作人員催落台，認真掃興！

側田 做乜趕我走？我未唱完！（設計對白）

欣宜雙手擁抱自己，哭成淚人。

耳機繼續壞

耳機失靈事件由頭場延續至尾場，欣宜兩度大叫「耳仔聽唔到聲」，雖然有工作人員即時上台「搶救」，但於接下來的演出都不斷用手調整耳機，幸沒有影響演唱。欣宜亦有控制易哭的情緒，但唱至最後一首歌《給最開心的人》尾段時，終於哭成淚人，下台前更以雙手擁抱自己，好像假裝與媽咪抱擁，繼而低下頭，於全場掌聲下完場。

「擁抱」媽咪？

騷後欣宜受訪大嘆鬆一口氣，但指耳機失靈令演出有點美中不足，她說：「當係學習經驗，後期發現有一邊機身裂咗，我又大汗，啲汗入咗就冇聲，但我都用盡自己能力唱到最好，希望大家體諒。」談及腳傷，她表示比想像中好，但要敷冰消腫。再問到離開舞台前的「擁抱」是否抱着亡母沈殿霞的意思？欣宜表示留待各位自己去理解。

文：音樂組

攝：林蔚恩