何啟南畀李麗珍嚇親

藝人何啟南入行以來拍過不少電影及劇集，包括《鬼馬校園》、《富貴黃金屋》、《心戰》和《迷》等，有機會與多位演技出色的演員合作，如李麗珍、董驃、田蕊妮及陳豪等。日前他接受東網巨星節目訪問，談到與李麗珍拍攝《猛鬼佛跳牆》的難忘場口，他透露李麗珍遇上靈異經歷：「有次等埋位，李麗珍一直望住上面，我就跟住佢望上去，睇吓有咩望，之後隔籬有人問佢望咩，李麗珍就話有個着住藍色衫嘅姐姐同佢揮手，但我乜都見唔到，搞到我都驚！」他大讚李麗珍美若天仙，絕對是女神級！至於電影《富貴黃金屋》，他表示與董驃合作得相當愉快，令他至今依然難忘：「佢好鍾意食嘢，未埋位就喺度打邊爐，一係就打牌，所以大家打成一片，拍得好開心。」此外，何啟南近日與太太楊穎靜外遊，慶祝結婚一周年。