蔣雅文自斷後路翻身雙贏
前歌手蔣雅文（Mandy）移居台灣十年，回想當年沒有知會家人便離開香港，更決絕地斬斷自己後路，將所有歌衫和高踭鞋轉贈他人！當年一個衝動的決定，如今為Mandy換來「文青女神」稱號，更令她認識到老公朱經雄，絕對是雙贏局面！
早前Mandy返港擔任瑞士天梭表全球首間期間限定咖啡店文青顧問，為咖啡店籌劃地點和裝潢。講到在台灣的生活，在當地開設食品店的Mandy笑說：「我平時好『烏where』，冇咩時間打扮，個頭夾住鯊魚夾，每日都要返工，好多朋友都以為老闆娘就喺嗰邊印印腳，以為我唔使做！」Mandy自言在工作上找到滿足感，故不會退休。
25歲人生轉捩點
講到當年放下歌手身份移居台灣，Mandy坦言需要一份衝動：「我有一團火，搵到對付自己嘅方法，當年我醒起自己25歲，開始懷疑呢一個年紀算係人生轉捩點，如果要轉行就係最後機會！我畀自己一晚時間諗，繼續留喺度定係走？」決定要走之後，Mandy即斬斷自己後路：「嗰陣時退咗屋租，將屋企所有靚靚開工衫全部捐咗出去同送畀公司新人，高踭鞋都送晒畀人！」Mandy承認自己任性，甚至沒有知會家人就選擇移民：「我係好難控制嘅反叛女，但我係屋企長女，有做好自己責任嘅！」
胞妹重蹈覆轍
Mandy在台灣認識了老公朱經雄，更指對方改變了她：「我本來係一個好嚴謹、步步為營嘅人，我選擇去台灣係我人生最任性嘅決定，去到台灣打開咗我比較隨性嘅開關，我識咗我老公，佢係一個完全冇辦法畀我控制嘅人，反而咁令到我好輕鬆，冇咁大壓力。」但她笑指妹妹蔣雅詩卻重蹈她覆轍：「妹妹都畀我影響得幾深，我覺得佢有啲過咗龍，我同佢都係陽光味重啲嘅女仔，覺得要靠自己，拍拖食飯要AA制，又唔鍾意收禮物，唔想欠咗人哋，比較偏激，但我30歲後學識平衡。」
文：專案組
服裝：Initial
場地：TISSOT Swissmatic Pop-up Cafe by BREAD,ESPRESSO &