古巨基決心執導筒搵小鮮肉幫拖
藝人古巨基在演藝界打滾多年，瓣數多多的他心中一直有個未圓的夢想，獲演而優則導的前輩張艾嘉贈言後，基仔決定把心一橫去尋他的導演夢，找「小鮮肉」演出其構思好的勵志故事。
基仔多年來在事業上努力拚博，既是歌手、演員，又是時裝設計師，不單擁有自家品牌，更有餅店等生意，但他坦言還有個導演夢：「呢個夢想都醞釀咗一段日子，等演唱會同廣東碟完成後，希望將時間完全擺去向呢個夢想進發。」基仔表示從前輩張艾嘉身上學懂做事要把心一橫：「之前過年嗰陣，我去咗張姐（張艾嘉）屋企拜年，同佢講開我夢想做導演嘅嘢，佢就分享之前經驗。當時佢有個古仔要拍，就把心一橫咩戲都唔接，只係做好佢個劇本，佢嗌我『所有嘢擺低，淨係做好呢件事！』係佢點通咗我。」
個個身份都鍾意
基仔的電影夢，可會邀圈中老友如古天樂、黃子華等參與演出？他坦言手上已經有個故事：「我同編劇坐埋傾過，個故事係一部勵志嘅戲，如果真係呢個劇本行先嘅話，可能會搵啲青春小鮮肉嘅演員。（你會唔會客串演出？）我要睇情況，如果真係首次執導，我可能會專心喺一個工作崗位上面。」本身已有多重身份的基仔，坦言每一個崗位都鍾意：「真係好難衡量鍾意邊個，主要睇嗰期我做緊咩，我就完全死心塌地，仆心仆命去搞。譬如呢排搞演唱會，我就踩行油去，咁咪歌手身份最緊要囉。」
米已成飯輕鬆晒
基仔近日忙於為其紅館騷排練，相隔7年，他將於5月10至14日舉行《WE我們古巨基世界巡迴演唱會》香港站特別版。這是基仔第五個紅館騷，多了人夫身份的他笑說：「Man咗好多咁囉！做人老公『一家之主』喎，身份或心理上係有唔同，以前因為古太怕醜，想低調啲，但依家米已成飯，唔使隻字不提咁嚴重，我覺得心態上係輕鬆晒，覺得好舒服。」
文：音樂組
化妝：Natalie Soo@ND&CO.
服裝：I.T
髮型：Mark Ip@HAIR
場地：英皇駿景酒店