夏雨出股惑被柴台
由藝人李司棋、夏雨、米雪、關菊英演出的舞台劇《秘密》，最近密集式綵排，劇中夏雨一人分飾孖生兄弟角色，分別與李司棋和關菊英演夫婦，「弟弟」跟「小三」米雪有攬攬床戲及咀戲，夏雨自言認真好艷福，不過他自爆曾自度一場露股戲，卻被「柴台」怕趕客！
《溏心風暴3》原班人馬演出的舞台劇《秘密》將即公演，各人埋首綵排，劇中演患腦退化症的李司棋跟「弟婦」關菊英排練一場鬧交追逐戲，李司棋向關菊英箍頸，追到索氣兼七情上面，她更大爆關菊英會性感上陣：「佢會着性感睡衣露事線色誘夏生（夏雨），佢好好身材o架！」夏雨即問：「你又知佢好？」司棋說：「我哋40年前一齊拍無綫劇《強人》，已經知佢有料！」
關菊英露事業線
夏雨指《秘密》是套瘋狂搞笑喜劇，多位演員都為藝術犧牲，他更主動要求露股：「因為演我老婆嘅司棋成日要搣我Pat Pat，佢要睇我股傷，菊姐（關菊英）又要色誘我，所以我度一場露股戲，但佢哋話唔好，趕客喎！」他無奈要收起「優質股」，但有關菊英睡衣露事業線場面補上，觀眾毋須失望。
不過更吸睛相信是演「小三」的米雪，夏雨笑言：「入場睇米雪叫床都值回票價！」米雪坦言入行以來絕少演發姣角色，今次過足戲癮：「我角色係被虐狂，又係小三，導演設計我要好似貓兒叫春咁嗌，所以我一發姣，夏生啲鹹濕嘢就走晒出嚟！」夏雨跟三位女角都有不少親密接觸，她們都叮囑他每日綵排和正式演都要刷牙！
巡演又拍埋電影
今次舞台劇為創作喜劇，夏雨強調並非《溏心》劇種的勾心鬥角，除會巡迴在內地、東南亞演出外，同一班底還會拍《秘密》電影版：「大家有默契，角色又新鮮，估唔到司棋姐可以咁放，所以會將組合變成演出班底，巡演同搞埋電影！」司棋表示舉腳贊成：「演員最慘係唔可以換塊面，但會珍惜演唔同角色，咁好玩，咁觀眾會覺得我哋呢班演員每次都有新嘢！」
文：影視組