李施嬅找數狂咀陳山聰
陳山聰與李施嬅老友鬼鬼卻首次演情侶，二人劇中咀戲超多，施嬅更指是從影以來最多的一次，笑言一次過找數。而山聰則爆施嬅經常「爆肚」考他。
無綫藝人陳山聰及李施嬅日前為無綫劇集《金宵大廈》在油麻地一幢舊樓天台拍攝外景，劇情講述二人首次約會，浪漫地在天台野餐等睇流星雨，他們表示劇中會發展前世今生的愛情故事，當中不乏奇幻元素，山聰分別飾演爛賭警察及保安員，施嬅則是舞女大班及空姐，角色甚有發揮！
「爆肚」考「老Pat Pat」
相熟的二人原來是第一次演情侶，施嬅自爆有大量咀戲，是她出道以來最多的一次，她笑說：「知道有咁多咀戲，開頭都有啲驚，因為同山聰太熟，而且我好少咀，記得只係咀過陳展鵬、李思捷、鄭嘉穎五個以內，今次真係一次過找數咁！」她又指飾演舞女絕對是豁出去，發掘出另一個自己：「戲入面好多人畀我迷倒，又會抽我水，我都要演得好騷。（有冇性感場口？）都有啲o架！我要跳類似芝加哥嘅辣舞，要對住好多人擘髀，都有啲尷尬！」
至於平日打扮潮爆的山聰，今次飾演小人物，他笑指施嬅相當活潑，不時「爆肚」考他，施嬅即說：「佢係老Pat Pat，考佢唔到啦！」
文：影視組