44歲利嘉兒奮戰8年佗B四個月
現年44歲、主持「笑談普通話」為人熟悉的藝人利嘉兒（Lily）於2010年下嫁經營製衣及門鎖的有米老公Bong，兩人婚後奮戰8年，終於宣布「造人」成功，無懼做高齡產婦！當初得悉懷孕，兩人開心得難以置信，要互摑對方來證實不是做夢。
Lily和老公婚後一直恨生B，昨日她在社交網上載一張「肚凸凸」的相片，並開心報喜：「踏入結婚8周年，我和老公收到了上帝很大的恩典！我們即將成為父母了！感謝身邊的家人、朋友及傳媒朋友一直以來的鼓勵及祝福，我們以感恩的心及滿滿的愛期待着秋天BB的來臨。」
遊韓順道拍孕照
Lily亦親自回覆本報透露已懷孕4個月：「BB性別要等遲些照結構才確定，但無論是仔或女，我們一樣喜歡。」她又指早前去韓國旅行時，老公操刀為她拍了一輯靚靚孕照。
Lily憶述得知有喜時，兩人喜悅心情遲遲未能平復，在懷孕初期與老公完全不能置信，如在夢中，笑言要互摑對方：「8年嚟都好努力造人，之前覺得應該好容易嘅事，但原來唔係，到後來已冇再抱過任何希望，竟然中咗！初初同老公完全唔相信，每日差啲要大家摑大家，醒未？係咪真？直至到依家穩定咗，個感覺先踏實啲，真係覺得有第二個生命喺我肚入面。」
高齡產婦冇壓力
首次佗B的Lily自言會保持心情輕鬆，不想太大壓力，自己開心BB才會健康，又指老公緊張大師上身，樣樣都不准她做，出街要有他陪伴，奶奶亦炮製好多東西給她吃，朋友則不准她穿高跟鞋，Lily笑說：「感覺突然之間變咗個小朋友咁，畀好多人管住，但都係開心，大家咁關心我。」
提到44歲屬高齡產婦，Lily卻淡定說：「雖然年紀唔細，但唔擔心，見身邊好多媽媽年齡同我差唔多，生出嚟個BB都好健康，總之唔好畀自己壓力，開心啲就得。」
文：音樂組