黃宗澤「攞命」女裝網民激讚
型男黃宗澤（Bosco）在網上晒出多張反串照，風靡萬千少女的他原來比真女人更美，獲網民讚靚到可以選美，不過他謙稱不能與王祖藍挑機：「我出嚟搞笑咋！」
高大靚仔的藝人黃宗澤，是不少女士心目中的「男神」，但原來Bosco扮女人比真女人更有味道，令男神形象幻滅！
莊思敏睇到嘔飯
前日Bosco在社交網上載多張女性打扮的造型照，除有OL女強人之外，還有可愛粉紅俏嬌娃及火辣女警造型，每個造型由頭到腳都悉心打扮，無論妝容、髮型，甚至魚網絲襪，都可見一絲不苟。當中最令人發笑的莫過於其火辣女警造型，他撐腰配合正經不笑的表情，「攞命」指數爆燈！難怪藝人莊思敏及龔嘉欣都忍不住留言：「食緊飯呀……衰仔」、「咩都嘔晒出來。」Bosco還留言問網友最喜歡哪個打扮：「上次問的係軍裝，今次問係女裝！多年來我穿過的女裝，你哋最喜歡哪一套？」不少網友留言大讚他非常靚女，尤其女警造型，更笑指他可以出道做女星，認真爆笑！
唔敢挑戰祖藍
其實Bosco有不少反串經驗，在2016年上映的電影《刑警兄弟》中已扮過多個女性造型，而在近日熱播的邵氏網劇《飛虎之潛行極戰》中亦有扮女人情節。對於網民指他靚到可以選美，Bosco透過電話受訪說：「唔好玩啦，我呢啲出嚟搞笑o架咋！（畀自己幾多分？）搞笑分就有七分。（網友話你扮得正過王祖藍！）唔好玩啦！祖藍係專業，我出嚟搞笑o架咋。」
文：專案組