夏雨床戰三女有咀戲 阮兆祥：佢應該畀咗錢幕後！
藝人夏雨、米雪、李司棋及阮兆祥昨午到馬鞍山出席舞台劇《秘密》記者會，即場與觀眾鬥演技送禮物，場面熱鬧。該劇將於4月底公映5場，眾人已進入密鑼緊鼓的綵排，試過一天排練10小時，一向注重養生的米雪煲湯及沖茶到場，而夏雨則準備滿枱食物為大家打氣。
李司棋笑言綵排後返家「成個人散晒」，阮兆祥即賣口乖表示可以充當「骨仔」，並於台上爆夏雨「大鑊」：「佢應該畀咗錢幕後，同三個女主角都有床戲同吻戲！」談到門票所餘無幾，夏雨即表示正洽談巡迴演出：「我個女會專程返港捧場，米雪佢哋『好嚴』，綵排講漏一個字台詞都即刻出聲，不過有時做Live個腦會有幾秒空白，兜得番嚟咪得囉！」