蔡卓妍做司儀搵克勤教路

擔任金像獎司儀的蔡卓妍(阿Sa)穿露肩晚裝與張繼聰踏上紅地氈,問阿Sa一身珠光寶氣是否出動私伙?她說:「梗係贊助啦!咁貴,邊有錢買。」她坦言做司儀心情緊張:「收到好多朋友傳短訊叫我唔好緊張,當玩就得,我心諗你做吖,點會唔緊張!」又指已向口才好好的李克勤請教,對方令她增加不少信心。

張繼聰指之前與阿Sa拍劇,故邊拍邊夾:「綵排過程好順利,希望大家享受,當中有溫情又有緊張環節。」問看好誰人獲獎?他說:「呢刻冇特別話邊個,睇好自己就算。」而於節目開始時,二人以表演歌舞揭開序幕。