上月10日度過60歲大壽的荷里活著名女星莎朗史東（Sharon Stone）於1992年憑電影《本能》走紅後，在洛杉磯比華利山買下一所豪宅，結果一住就25年，由於該屋為她帶來好運，她一直都唔捨得「放」，究竟間屋有咩吸引之處留住莎朗呢？
據莎朗史東表示，買這間洛杉磯大屋前，居住的寓所常被狂迷嘗試進入，她說：「搞到差人成日都嚟，直至佢哋都頂唔住，佢哋提議我不如搬屋，搬去間較安全嘅居所！」結果，25年前她搵到合適的居所讓三名兒子成長。
最近莎朗邀請好友兼著名室內設計師Douglas Truesdale為居所翻新，她亦有份參與設計。Douglas大讚莎朗在設計方面有眼光：「莎朗絕對係A級嘅藝術家！無論係演戲或攝影又抑或係裝飾方面，佢給予無窮精力同創意喺設計上。佢去過全世界好多地方，王宮、遊艇、白宮，你講得出，佢都去過晒。佢就有如視覺資料嘅海綿，吸收好多之後就放喺我哋嘅設計上。」據知莎朗主力翻新就是客房及泳池，她形容間屋擁有自己的聲音，如果她與設計師懂得它的語言，在設計過程上就可以更得心應手！
最近莎朗首次向傳媒介紹這個「安樂窩」，全屋以法式風格設計，睡房擁有一個大型火爐、鋼琴及掛上一盞燦爛奪目的大型水晶燈。而一向愛好大自然的她亦在屋外設有一個大型的後園種滿花草樹木。除了崇尚大自然外，她亦是藝術發燒友，在家中收藏了好多名畫，包括Basquiat及中國畫家張曉剛的名畫都有。
入行將近40年的莎朗史東在荷里活歷盡艱辛，才有今時今日的地位！她主演的多部名作包括《本能》（Basic Instinct）、《偷窺》（Sliver）及《宇宙威龍》（Total Recall）等票房大賣，據統計莎朗主演的電影於北美的合共票房超越119.34億港元，對此，她說：「嘩！真係唔知有咁好成績，呢個數好勁。我相信咁證明我透過電影帶畀好多人歡樂。」
1992年拍攝《本能》時僅收390萬港元片酬的她，2006年拍攝《本能2》（Basic Instinct 2）的片酬已勁升27倍，高達1.06億港元！雖然已是億萬富婆，但她仍有用相架鑲起人生中首份工的100美元薪水放在家中作為紀念。她說：「我係賓州嚟嘅窮女子，我將我首張100美元紙幣鑲起，放喺木櫃內，係我喺紐約做模特兒嘅薪水。」
與莎朗差不多同期出道的55歲女星狄美摩亞（Demi Moore）憑90年代經典愛情片《人鬼情未了》（Ghost）走紅，而她與莎朗一樣在住屋方面都較為長情！兩年前她以5.8億港元放售位於紐約中央公園的7,000呎三層複式6房閣樓無敵樓王。不過兩年來一直無人問津，最終她割價促銷，以3.51億港元成交！
雖然狄美跌價賣樓，但該屋是1990年她與當時老公影星布斯韋利士（Bruce Willis）以5,600萬港元買下，所以都有得賺！據知整間屋除了設備齊全，有娛樂房間、露台及客房之外，最大賣點而又最值錢就是那個「零死角」的無敵景觀！
文：外娛組