余文樂知佗B辛苦想停工慰妻
榮升爸爸的余文樂昨日心情靚爆宣傳網劇，坦言心痛「樂嫂」王棠云佗B辛苦，希望有更多私人時間陪老婆。對於被指是「先有後婚」，他稱：「先後次序唔代表乜！」
藝人余文樂、任達華、林家棟、張秀文、何浩文、胡然、文凱玲與導演王晶等，昨日到將軍澳電視城出席網劇《冒險王衛斯理》記者會。去年12月樂仔與「樂嫂」王棠云拉埋天窗，日前再宣布將為人父，喜事一件接一件。問到太太身體狀況？他坦言老婆孕吐反應較厲害，將會在港生B。再問會否放假陪太太？他坦言很想有更多私人時間：「都有諗過停工。（怕老闆唔批？）唔會，但都要睇到時拍戲同工作安排。」
「次序唔代表乜」
仍未知BB性別的樂仔直認恨生女：「不過我怕會唔想做嘢，成日想返屋企。華哥（任達華）有恭喜我，佢都有講生女係會特別掛住屋企。」問到太太預產期？他繼續賣關子，對於被指結婚時「雙喜臨門」，他說：「我唔會刻意去解釋，先後次序唔代表乜。」
監製王晶指該劇會有一連三季及三個主題，問到會否長拍長有？他說：「要睇觀眾反應，今年都會開一部衛斯理電影，但未定實人選，可能搵番樂仔。」早前他出席活動討論港產片的版權問題時，直指內地不少網絡大電影借向港產片致敬為由，但未有正式購買版權感不滿，最終嬲爆離場，由於《冒》劇有內地大型公司投資，問他會否擔心影響合作？他說：「唔會，係啲渣公司先會咁做。（擔心影響你喺內地發展？）我冇咁嘅擔心。」
張秀文被迫除剩內衣
同場的張秀文以低胸造型亮相，胸壓一眾「晶女郎」，問到劇中會否性感演出？她說：「有一場戲畀林家棟捉咗做人質，叫我除衫剝剩內衣。」雖然慘被「虐待」，但秀文感謝家棟細心教做戲：「演出八年，今次係戲份最重嘅一個角色。」
文：影視組