龍躉村姑鯨吞榴槤 麥美恩恃醜行「胸」真女神

「超君趕丹」

古有吳君如同苑瓊丹子，今有麥美恩「超君趕丹」，大人細路都鍾意！外貌協會當道，以為人靚波大有發圍時，身為前港姐梗頸四、憑住超過35吋「豪華臀」贏得「龍躉村姑」之稱嘅麥美恩，拋開美貌與智慧嘅傳統港姐包袱，情願行「歪路」走麻甩女生諧星路線，玩騎呢扮醜肯自嘲，淨係肯表演血盆大口鯨吞榴槤再加啜手指都夠絕，儀態？咩嚟o架？真情流露，嘈喧巴閉大笑姑婆做自己，唔使學前輩吳君如撩鼻，已經夠晒入屋！做傻大姐扮醜都要有條件，有個靚樣Backup，醜得嚟唔會討厭，造成環境污染！佢行出嚟要醜要騎呢生鬼有喜感又得，要美艷動人大方得體做主持壓場都得，真係出得廳堂，入得廚房，上到大床，唔怪得早排睇電視，連續兩個鐘三個節目都係佢，單係舊年仲拍咗八個廣告，贏得網民猛話：「識睇一定睇麥美恩！」

條脷識轉彎

相比同樣港姐出身嘅陳凱琳、蔡思貝同黃心穎等，話晒係靚女一名、有兩個招牌酒凹嘅麥美恩，反而有血有肉似番個人，從來冇恃靚行「胸」同人鬥做女神，利用本能即係條脷同個腦一樣識轉彎，成為新一代綜藝女王 ！牙尖嘴利都唔係大晒，關鍵係肯做下靶位！成功嘅下靶位，唔係一味識笑成碌木咁任寸任窒，又或睩大雙眼把聲高八度咁話：「真係o架？點解嘅？」做下靶位都要有腦，先可以有火花，好似佢同森美撈亂骨頭咁喺港姐競選互窒，令森美還擊話嚟緊50年台慶都唔想見到佢，引發全城網民洗版式話最好睇嘅鬥氣孖寶！

零港女囂張味

做下靶位好似畀人恰到上心口，識玩反而博到民心戥你唔抵，退一步海闊天空，無論對住老細或老婆，有時做吓下靶位有着數，有得退一步，下次先有機會食住上，否則去到盡，畀你贏晒全世界，真係贏咗場交輸咗個家！好似麥美恩咁，叻在見好就收，恰到好處，唔會周圍辣火頭，先會贏好感得民心。唔怪得成為唐詩詠勁敵，大批巴打絲打都話佢都係絕世好女友，仲話娶老婆一定揀佢！唔少男人都呻娶個老婆返嚟乸口乸面兼「雙失」：失自由失戶口，人財兩失，仲話娶個靚嘅又驚戴綠帽，娶個醜嘅，睇嚟惡心，諗起傷心，但擺喺屋企一定放心！計我話，幾靚幾醜都會老會殘，開心最重要，好似麥美恩咁幽默爽朗識搞氣氛，又肯蝕底畀足面你，零港女囂張味，唔怕話好似娶咗個阿媽返嚟，又真係諗得過喎！

Nuts哥