黃秋生異母兄弟重逢 神奇如中六合彩！
去年56歲影帝黃秋生透過社交網公開尋親，經過一年時間，皇天不負有心人，他終於與兩位同父異母的哥哥重逢！兩位哥哥更專程由澳洲來港與他見面，秋生坦言神奇及非常開心，三兄弟雞啄唔斷自封「三劍俠」！但當他帶兩人見其母時，其母表現激動，秋生要立刻拉走兩位哥哥。
生於單親家庭的黃秋生，4歲時被外籍父親Frederick William Perry遺下他與母親在港生活。去年他上載昔日一家三口黑白照尋父，昨日英國廣播公司（BBC）報道秋生終於尋親成功，與兩位素未謀面的孖生同父異母哥哥John及David重逢！
上周二，John與David來港與這位影帝細佬相認，秋生表示第一眼見面已不覺得生疏，又指兄弟重逢令他有所改變：「好似有啲感情、感受醒咗，發覺原來我都有啲嘢開心嘅！爸爸曾經喺信入面講，如果我係一個Good Boy，佢就會幫我搞掂所有嘢，我諗佢依家覺得我係Good Boy喇啩！所以咪Send兩個大佬嚟畀我囉！」John及David更形容三兄弟是「三劍俠」。
約定大家族BBQ
秋生接受本報訪問時表示，當初決定尋親只是無心插柳，某夜酒後想到現今科技先進，可放合照上網一試：「同BBC做嘅訪問講屋企部分其實好少，但都有好多外國人睇到，有位外國女士搵咗爸爸嘅家族人名列表畀我，當時我覺得好神奇！」問到失散多年，見面時有否激動落淚？他說：「唔會啦！你估《家春秋》咩！我哋約咗遲啲可能聖誕節一齊BBQ，依家兩邊加埋好大Family，我都未試過咁多人一齊BBQ。（之後點Keep住關係？）E-mail聯絡，有時間就飛過去見吓。（佢哋知有個影帝級細佬有冇好驚訝？）我都係普通人一個，如果係監犯就話特別啫！演藝係我嘅事業，佢哋同我嘅關係，同身份冇關，有個哥哥上網睇過我啲資料，見到面之後都唔覺有咩特別，反而出到街見好多途人搵我合照，先覺得得意，仲搞笑話要合照埋一份。」
帶兄探望 黃母激動
三兄弟四日三夜香港見面之旅，秋生帶他們去過不少地方，而且有說不盡的話題，如談到爸爸以前的軼事。他又笑言不停傾不停食，遲早變到如兩位哥哥般大肚腩。此行John及David亦有探望秋生母親，秋生媽因中風行動不便，但當見到John與David即表現激動，秋生說：「我冇同阿媽講過佢哋嘅身份，可能都知我哋關係，阿媽好似想講嘢同起身咁，見到阿媽咁激動，我好快拉咗兩位哥哥走人。」
此外，巧合地兩位兄長自行在網上所訂的酒店竟是英皇駿景酒店，其中一日他們偶遇英皇老闆楊受成，楊生相當好客請食飯，但笑言不太相信秋生這個神奇尋親之旅，懷疑秋生是否整蠱他，而英皇經理人霍汶希（Mani）亦感嘆世事巧合！
昨日，秋生接母親出院時再受訪，直言與兩位兄長重逢猶如中六合彩，並指他們略懂廣東話：「佢哋喺香港大，17歲先返英國，佢哋叫自己做『木頭』！」又指母親因心臟及肺氣腫入院，情況已好轉。
文：影視組