蔣怡再拍更激孕照唔預老公

現年40歲的蔣怡與珠寶設計師老公翁狄森育有4歲囡囡翁容，她坦言當初女兒出世是一個意外，並指老公實牙實齒表示不會再生。但當老公知道將有第二個BB來臨，竟開心到失去理智，她說：「去朋友派對，我未宣布，佢見到朋友就宣布我佗仔。我哋出街拍拖，佢竟然去男校小學嘅開放日，啲朋友見到我哋都好驚訝。」

驚影得鹹濕

提到影大肚照，蔣怡預告今次比上次更大膽，但一定不會交由老公操刀：「上次嗰輯好隨意，冇諗過影乜嘢造型，今次可能想有啲特別主題，但一定唔會畀佢操刀。佢有影其他女仔，我成日同佢講，我咁容易影得靚，你影我靚唔係你叻喎！你去影吓其他女仔。同埋我老公太了解我，我反而想有啲唔同角度，佢太藝術家，費事佢影得我太鹹濕，成日叫我唔好着衫。」

蔣怡「意外」有喜，為家人帶來喜悅。	蔣怡懷第一胎時拍下性感孕照。	蔣怡大爆老公翁狄森知道她佗仔之後，欣喜若狂。

見食譜想嘔

蔣怡表示今胎佗得特別辛苦，懷孕4個月時經常反胃，莫說煮食，連睇食譜都想嘔：「我係廚師，好鍾意食嘢，但突然4個月冇晒食欲，初期都瘦咗，到後來或者係我渴望想食好耐，又餓咗好耐，又驚BB唔夠營養，所以食得嘅都擺入口，逼自己食有營養嘅嘢。依家中午日日食三隻雞蛋，結果一個月肥咗十磅，所以我知自己點解咁辛苦，辛苦唔係妊娠反應，而係一個月重咗十磅，身體接受唔到。」她笑言今次佗Ｂ，自己的體重將會升至人生高峰。

文：名人組

服裝：yi-ming 場地：軒琴居