黃嘉樂「打」定底等起飛

雖於熱播劇《果欄中的江湖大嫂》內只佔戲七集，但黃嘉樂的角色對高潮位起重要作用，日前受訪時「重遊舊地」，勾起不少拍攝回憶，嘉樂自言對戲中造型相當緊張：「因為想望落去霸氣啲，所以我同監製提議留鬚。今次扮演一個退隱嘅江湖大佬，為咗生存及保護妹妹先加入黑道，但內心係善良嘅，所以絕對係一個新鮮嘅嘗試。」他難忘拍攝一場生命受威脅的戲份時，打足一日兼於懸崖邊取景，幸好拍攝效果相當不俗，辛苦亦值回票價。

新劇硬記醫學名詞

原來嘉樂對拍動作戲情有獨鍾，曾試過開工受傷、致十字韌帶斷裂的他笑說：「就係因為受過傷，依家我拍打戲會識得借位，今次打得咁犀利都完全冇事！《果》劇可以話係我拍劇以嚟打得最辛苦嘅一次，但我本身鍾意打，又跟師傅學過拳腳功夫，希望繼續有機會發揮潛能。」

黃嘉樂重遊果欄回憶拍攝時的辛苦，點滴在心頭。	黃嘉樂在《果》劇留鬚扮大佬，成功轉「型」！	黃嘉樂新劇演醫生，要講醫學名詞呻苦。

入行16年的嘉樂至近年才漸為觀眾熟悉，但他不太介懷過往沒有擔正的機會：「即使依家拍緊新劇《白色強人》咁，我都係副線演腦神經外科醫生！不過坦白講，我梗係希望喺我成長嘅地方（無綫）有機會孭重飛啦！之前公司節目巡禮搵咗我拍新劇《十兄弟》嘅預告片，我喺角色上做咗啲工夫，希望日後真係有機會演出。」談到忙於拍攝《白》劇，他笑言最難是要背醫學英文名詞：「啲醫學名詞好專業，我講嘅係一口港式英語，所以要搵人教及糾正，希望發音方面純正啲。好彩拍檔張曦雯英文好好，佢即場真係幫到我好多。」

文：影視組

攝：劉智源