陳煒袁文傑爭氣上位

勇字行頭 關心後輩

1996年亞姐冠軍陳煒過檔無綫後，雖年屆中女，但依然躋身一眾小花中，以「江湖阿嫂」形象殺出血路，在無綫新劇《果欄中的江湖大嫂》擔當女一位置，就連影后楊千嬅都愛她年前劇集《梟雄》的演出，二人更會在無綫重頭劇《多功能老婆》演閨蜜，相信必定擦出火花，因煒哥與千嬅都是「勇」字行頭，戲內戲外相信同樣能成為閨蜜。

其實煒哥的歷練，打從選美至劇接劇而煉成，可說是給現今小花一個奮鬥目標。今次她在《果》劇與岑麗香和馮盈盈合作，煒哥坦言三人感情要好：「我哋都係選美出身，明白佢哋遇到嘅問題，大家都好多交流。佢兩個都好乖，做晒功課先入廠，佢哋都有自己嘅意見，唔敢講話咩提點，新人最需要係關心，我成日會請佢哋食嘢，佢哋已經覺得好Sweet。」

袁文傑	袁文傑、陳煒	「亞視年代」的二人與現時樣子分別不大，但經歷多了，男人味、女人味出晒嚟。

凍齡拍檔 添成熟味

煒哥何止是小花偶像，就連舊拍檔袁文傑亦視她為女神。早於1997年，二人首次在亞視合作劇集《雪花神劍》，當年大家都很年輕，如今相隔21年再次在無綫碰頭兼演情侶，兩人的外貌均冇走樣，只是多了一份成熟味道。袁文傑說：「我仲記得當時未簽無綫，入嚟傾約時坐喺餐廳周圍望，好記得嗰次我見到煒哥行過，佢同我講叫我快啲簽。」

陳煒覺得努力是必須，但際遇亦很重要。	「亞視年代」的袁文傑、陳煒。	岑麗香（左起）、陳煒及馮盈盈因拍劇成為好友，絕冇代溝。

後來袁文傑憑劇集《不懂撒嬌的女人》角色「游生」升呢，有這個成果，他非常感恩，故面對舊拍檔時憶起很多回憶，更特別多謝他的恩師：「我要多謝當年夠膽搵我呢個新人做男一嘅阿叔（蕭笙），佢真係我恩師。嗰時我乜嘢演戲經驗都冇就拍《雪》劇，阿叔畀好多機會我，我同煒哥當年合作，大家都新，互相關照啦。我覺得煒哥好有衝勁，仲記得當年我哋一齊幫手拉威吔，都係一種團隊精神嘅表現，拉邊個呢？好似係楊恭如，哈哈！時至今日，相隔咁多年，再喺無綫見番煒哥，嗰日一齊拍第一場戲，我真係好觸動，所以要即刻影番張相留念。」

袁文傑讚陳煒入行至今依然拚勁十足。

袁文傑與陳煒於亞視時合作無間，如今於《果》劇演情侶，依然默契十足。

人到中年 大把市場

煒哥重遇袁文傑又何嘗不是感觸萬分！她說：「今次見番佢，發展好似火箭咁上位，呢個係佢應得，本身亦有條件，係爭氣嘅成果，所以我好欣慰，因為之前佢都被埋沒咗一段時間，發展好似停頓咗。不過人生嘅際遇真係好緊要，真係冇得解釋，男士到呢個年紀仲有市場，我都好戥佢開心。」

其實煒哥不用羨慕袁文傑，因為即使年屆44歲「中女」的她同樣有市場，其心理質素亦保持最佳狀態，所以從少女角色「過渡」中女階段，煒哥可謂游刃有餘。她說：「持續到人氣我都好開心，因為我哋係真心喜歡演戲，放咗好多時間，成果係相輔相成。做呢行心態好重要，如果唔係全情投入，係好難做。不過呢行都好講運氣，男仔好啲，演齡長啲，女嘅就有掙扎位，要保持位置，一啲都唔易。都知自己唔係十八廿二，惟有盡量做好自己範疇，等監製認同自己。」

文：影視組