郭秀雲冇膽食曱甴
向來關注海洋保育的名媛郭秀雲（Sharon），早前遠赴紐約出席探險家學會舉行的晚宴，席上宴客的「山珍海味」令Sharon嘆為觀止，齋睇唔敢食！Sharon透露探險家學會每年都會舉行一次聚會，集世界各地的探險家，當中不乏知名人士：「我係東南亞探險家學會第一個女成員，紐約聚會都參加咗五、六年，我師傅係海洋學家，專注海洋生態，佢都有去。」
用昆蟲整麵粉
Sharon於社交網上載當晚的「美食」，有曱甴、蜘蛛、黃粉蟲、和尚魚等，件件「珍品」，睇到都驚！問到Sharon對菜式有何意見？她說：「個會好多探險家，去過好多不同嘅地方，見識好多，所以整啲得意嘅嘢出嚟，咁當你去到有啲地方，例如沙漠咁冇嘢食，你咩都要食。但今次我有啲未習慣，因為怕曱甴，真係唔敢食，條和尚魚我都冇食，雖然佢唔係受保護魚類，但要用深海嘅拖網先捉到，呢種拖網捉法對海洋生態好大影響。」
Sharon又指不少地方都有食昆蟲：「依家有啲國家都開始考慮點樣好好運用昆蟲，有啲國家想將昆蟲整麵粉。」她表示晚宴後還相約一班女性朋友到酒吧：「間酒吧係全美國最舊嘅酒吧，以前只畀男人入，牆上仲掛住舊報紙寫咗當時唔畀女人入酒吧，我哋成班女探險家每次都會去飲杯嘢。」
文：名人組