黎瑞恩破縱火案喪食「皇家飯」
在屋邨長大的黎瑞恩，早前重遊小學母校，勾起一幕幕搞笑的童年回憶。因使命感促使，令她成為少年警訊，曾目睹一宗縱火案，經她舉報後獲頒好市民獎，笑言食了很多餐「皇家飯」。
忙為4月紅館演唱會綵排的黎瑞恩早前重遊母校，自細在屯門屋邨長大的她，就讀區內的屯門台山商會小學，走遍校園每一個角落，勾起不少童年回憶。她笑說：「之前學校40周年搞咗個盆菜宴，我都有同啲同學仔返嚟敍舊。」
鎖男同學入女廁
談起校園生活，阿恩自爆不是乖學生：「成日拉啲男同學，鎖佢哋入女廁。」讀五、六年級時她被選做風紀：「做風紀揸住雞毛當令箭，有次我喝啲學生，班房個老師出嚟話我『你可唔可以細聲啲』，因為我用咗丹田運氣，好大聲。」在學校是活躍分子的她，既是田徑隊，又代表學校參加游泳比賽，不過就游包尾，一度令她沮喪。
失敗過的阿恩未有放棄，放暑假時進行特訓：「老師畀咗好多游泳錄影帶我睇，我係模仿力極強嘅人，不停睇不停練習，走去參加公開比賽贏咗冠軍。跟住嗰年又參加校際游泳比賽，撞番同一班人，佢哋係咁超住我，我一跳落水唔理三七廿一狂游，結果我攞咗第一名，看台啲同學歡呼，你明唔明嗰種感覺，幾咁虛榮！」她笑言這個獎盃至今仍在學校收藏。
阿恩當年曾參加少年警訊，清楚記得編號是「340661」，她覺得好有使命感，因為細個夢想做警察。她在11、12歲時攞過好市民獎，因她目睹幾名o靚仔在幼稚園放火：「我都有少少驚，唔敢舉報佢哋，因為嗰啲人住喺我隔籬條巷，但啲警察上嚟盤問我，我即刻講晒出嚟。」
獎金買梳化
她記得當時獲700元獎金，媽咪用獎金買了一張新梳化。之後她以少年警訊身份拍攝片段，講述事件經過：「嗰啲阿Sir、Madam成日叫我嚟食飯，佢哋好鍾意我，所以我都食咗好多『皇家飯』。」
文：音樂組
攝：劉智源
化妝：Meegan Seak
髮型：Sev / John@Hair Culture