千嬅押後追B返無綫秘撈
肓有一子Torres的影后楊千嬅，雖有意再追B，但最終敵不過無綫「金牌編審」陳寶華的邀請，闊別公仔箱17年再回歸拍劇！千嬅於新劇中演多功能老婆，絕對貼合其現實生活，湊仔、返工兼做賢內助，將「全能」呈現出來。
曾編製經典劇集《真情》的金牌編審陳寶華，相隔16年再度回巢打造無綫劇《多功能老婆》，昨日一班演員周柏豪、黃浩然、陳煒、朱晨麗、黎燕珊和黃錦燊等齊齊亮相記者會。在活動中更壓軸宣布，女主角由楊千嬅出演，是她繼2001年播出的《美味情緣》後，再度重出江湖！為與陳寶華合作，千嬅更不惜押後生B大計，可見對方魔力。
丁生做特務密斟
提到相隔17年再拍劇，千嬅笑說：「我入行唔係好耐咋！舊年演唱會期間，余詠珊打電話搵丁生（丁子高），話陳寶華想搵我拍劇，我都好奇點解會搵我，佢話覺得呢個角色係我！最近我都追緊深夜重播嘅《我本善良》，可以同寶華姐合作係一個增值，但唔知點解咁秘密，搞到我好似秘撈咁，丁生就好似特務咁幫我去傾。」劇集將在暑假開拍，相信對家庭影響不大。問到酬勞方面是否吸引？千嬅說：「係一個合理比例，今次製作班底好好，大家都想好似寶華姐咁講，拍一部好嘅港劇。自己睇港劇長大，覺得好榮幸。」千嬅在劇中將與陳煒及朱晨麗演閨蜜，她笑言很喜歡陳煒：「佢套《梟雄》好好，一直都覺得佢好有氣概。」
黃浩然感激陳寶華
至於黃浩然與千嬅繼電影《新紮師妹》合作後今次演夫妻，浩然表示：「寶華姐係我恩師，佢真正將我帶入電視台，當時我連劇本都未識睇！」而柏豪就笑言與千嬅及陳寶華合作，令他有點怯：「開演唱會都未試過腳震，加上女主角要保密，擔心講咗啲唔應該講嘅嘢！」而在《真情》中演「貓屎」一角的黃錦燊亦應邀回巢，演出曾經風流的上等人。朱晨麗則與洪永城演夫妻，是個會虐待老公的貪靚空姐，她說：「今日見到千嬅真係好開心興奮，估唔到今次演好Close嘅閨蜜。」
《多》劇將於北京、東京及香港三地拍攝，而闊別香港15年的陳寶華昨日受訪，被問到《多》劇曾傳聞是鄧萃雯擔演，她表示：「我又唔係得一檔戲，今次角色比較適合楊千嬅。（千嬅身價貴？）唔係由我傾，我都想問番佢，佢係我心目中嘅女主角，但我一直以為冇可能。」
文：影視組