唐詩詠醉姿整：點都要刷牙瞓
今年齊齊升呢視后的唐詩詠與李佳芯，新一年即火速合作大鬥演技。在新劇中化身「醉嬌娃」的詩詠，笑言絕不會醉爆失場，更自爆點醉睡前都一定會刷牙！至於形象惹火的李佳芯，自爆醉後會不停講英文，並笑指今次少有香艷戲份，是從良好機會！
視后唐詩詠與李佳芯（Ali）日前現身中環Soho，齊齊為新劇《白色強人》首日開工拍攝一場酒吧訴苦戲份，講述詩詠醉倒街頭後打電話給前夫馬國明傾訴，穿斗零踭的Ali扶住「醉嬌娃」詩詠，舉步維艱險跌！
讚「潮男」好仔
詩詠表示現實中甚少飲醉失場：「情緒兩極化時先會飲醉，唔開心嗰陣仲會飲到爆喊，但點醉都好，返屋企一定會刷牙先上床瞓！」她又指未試過醉酒後致電舊愛，但有接過醉酒男士電話，根據經驗最好不要給予對方反應。問到前度洪永城有否試過醉後來電？詩詠直言未見過他飲醉。
講到早前好友拿拿淋介紹男仔給她認識，她笑言是介紹給江美儀：「其實識咗好耐喇，嗰個男仔係DJ，我同佢冇可能嘅！」但又不忘讚對方是好男仔：「佢之前畀人話係『肥版伊健』，依家講佢變潮男，不知幾開心！」
收暗戀者短訊
同場的Ali透露與馬國明有感情線，但只是傾慕之情，沒有親熱戲，笑言終於「從良」不用拍親熱戲和暴露戲：「喺我嘅演出字典唔一定要呢兩個元素，終於可以好專心咁演戲。」她表示為配合劇情而飲了少少紅酒，並自爆醉後會不停講英文。問會否打電話給舊愛？她說：「只係收過暗戀我嘅男仔飲醉咗打短訊嚟，係咁亂講嘢好奇怪，事後都問番佢係咪飲醉，唔會當係真。」
文：影視組