Jessica@SG遇見「南柱赫」心動！
女子組合Super Girls成員Jessica重遊夢想之地洛杉磯，嚮往「Hea爆」生活的她立志10年內賺夠1千萬再搞移民過退休生活，而此行最大收穫就是遇上「翻版南柱赫」，令單身的她心心眼。
蔡明思（Jessica）日前撇下其餘四位Super Girls成員單拖飛往美國洛杉磯（LA）度假，10日行程中，每日都是狂食，漫無目的四圍蕩盡情「Hea遊」。昨日Jessica接受訪問時，指此行主要是探望6年沒見的舊同學：「我喺LA讀書嘅，返港後太忙，有段長時間冇返LA同啲同學見面，重遊舊地真係好開心。我好鍾意嗰度嘅環境，周圍種滿棕櫚樹，成日陽光充沛，喺呢度乜都唔使做，好舒服。」
個人品牌發大嚟做
問可會考慮移民當地？Jessica指LA正是她的夢想地，但強調不是想在美國發展演藝事業，而是打算退休後到當地歎世界：「我同啲同學講，好想嚟呢度生活，放假、放工，就同朋友去海灘嘅草地傾偈或者湊BB，曬吓太陽，呢啲就係我最理想嘅生活，呢個情景成日出現喺我夢裏面。（打算幾時退休？）估計起碼要10年後，目標係儲夠1千萬港元。」為了早日達成願望，Jessica揚言要努力賺錢：「我諗住繼續唱歌之外，要將個人品牌發大嚟做，除咗推出眼鏡外，仲會生產其他商品。」
狂食越南韓國菜
Jessica更推薦到LA旅遊，必食越南粉及韓國菜，她說：「我發覺呢度嘅越南粉同韓國菜比佢哋本土更加好食，仲要記得食冬甩。」問她可有艷遇？她笑言只有「偶遇」：「我去一間名校遊覽，有個男仔個樣好似韓星南柱赫，佢真係好靚仔，遠睇已經有心動嘅感覺，個心跳得好快，嗰一刻令我好多幻想，心諗如果我變番10幾20歲，同佢一齊返學就好啦！」
文：音樂組