甄子丹「葉問」打到去美國當老婆面招親
「宇宙最強」甄子丹趕返港出席春茗，期間透露電影《葉問4》開拍在即，而上集「喪偶」的他竟當着太太汪詩詩面前，打趣指要另覓紅顏知己。對於今次葉問「衝出亞洲」，子丹亦大感興奮，更透露將接拍四部戲，可謂財源滾滾。
甄子丹夫婦昨午率領旗下藝人包括湛琪清、湯鎮業孖仔湯君慈及湯君耀等，出席自己的電影公司春茗及團拜，場面相當熱鬧，詩詩年屆88歲的外婆亦畀面現身，子丹甫見婆婆即擁着對方Sweet爆說：「我娶到好老婆完全因為婆婆，係佢同屋企人講我信得過，我先娶到詩詩，我好多謝婆婆。」
為了今次團拜，近日身在深圳趕戲的子丹昨日凌晨收工後便連夜趕返港，「年中無休」的他表示自去年6月開始，無間斷拍戲：「淨係農曆新年去咗4日澳洲陪屋企人，依家拍緊嗰部都要快啲埋尾，4月要交人去拍《葉問4》，之後仲有一套西片同另一套電影等緊我，今年起碼拍4套。（冇時間陪太太點補償？）我所有嘢都畀晒佢喇，我覺得冇嘢緊要得過健康及家人。」
大讚湯鎮業孖仔
今次子丹以逾1億港元片酬落實接拍《葉問4》，可謂萬眾期待。問到該片籌備進展，子丹說：「我有同導演葉偉信通過電話，但詳情未知，暫時只可以話畀大家聽，葉問今次『衝出亞洲』，會去美國拍外景，劇情交代葉問搵李小龍。（係咪冇熊黛林？）呢個肯定，上集佢辭世嘛！（咁你有冇感情線，叫導演幫你搵紅顏知己？）可以向導演提議吓喎！搵個拖吓手仔。香港影壇咁多靚女，不如你哋（記者）幫我諗諗。（叫太太演啦！）咁又唔得，我咁大間公司要佢幫手打理！」
另外，子丹對新加盟的湯君慈及湯君耀讚不絕口：「之前同佢哋拍咗部勵志電影，計劃暑假前後上映，佢哋好乖，又幾靚仔，希望大家畀多啲機會佢哋。」
文：外娛組