林奕匡冧妻宣言無數個十年陪住我

林奕匡（Phil）與拍拖10年的前無綫財經主播兼體育主持李靄璣（Rikko），去年8月在加拿大註冊結婚，昨晚在港補擺喜酒，筵開21席宴請親朋好友。去年3月6日，Phil在澳門求婚成功，他特別揀選求婚一周年來擺酒，別具心思。愛妻號的他為了讓太太瞓晏啲，特地簡化接新娘環節，但亦有按傳統向長輩斟茶，當中Phil向太太的外公斟茶時更一度眼濕濕。

甜到漏咀足6啖

下午5時許，一對新人換上西式禮服在酒店切蛋糕，二人由兄弟姊妹團帶領進場，期間應記者要求多次錫錫，甜蜜滿瀉！姊妹團成員包括伴娘鄧佩儀、黃美棋、張名雅及麥雅緻等，而兄弟團則有伴郎馮允謙、Dear Jane主音黃天翱（Tim）及女扮男裝的Robynn & Kendy等，黃美棋男友鍾健威則擔任司儀。

儀式後一對新人受訪，談到最感動時刻，Rikko自爆斟茶時已喊到似豬頭：「回顧一生人入面影響過我哋嘅親戚、屋企人，成件事好感動。」Phil則趁機大講愛的宣言：「從今以後令佢唔使有擔心，要幸福快樂，呢十年係我最幸福快樂同成長得最多，佢令我變一個更好嘅人，希望往後無數個十年都有佢陪住我。」

兄弟姊妹團伴着一對新人登場，幸福滿瀉。	冧歌示愛	補拋花球
向長輩斟茶時，林奕匡與太太都忍不住落淚。

內定馮允謙接花球

談及太太日前外遊時大晒比堅尼相，問Phil會否下禁令不讓她再派福利？Rikko搶答指當時Phil有要求先讓他過目：「佢冇反對就即係可以，要讚佢嘅係咁多年佢都係100%信任我，無論我有啲咩夢想，只要係我想做，佢都會支持我。」又表示去年的加拿大婚禮忘記拋花球，故昨晚會補番。對此，擔任姊妹的黃美棋大爆早已內定馮允謙接花球：「佢好似有啲心急，話希望女朋友拎到。」又笑言即使接到花球都會拋給他。

文：音樂組