Keyman丹尼爾施口技追擊世界盃

足球評述員馬啟仁（Keyman）、陳恩能（丹尼爾）與藝人黃心美（Scarlett）前日下午以主持人身份現身奧海城的《Now TV x ViuTV 2018 FIFA世界盃TM啓動禮》，在台上介紹世界盃期間的一系列精彩節目，又與一班藝人大玩遊戲，場面相當熱鬧。接受訪問時，Keyman和丹尼爾更一邊講波經一邊撩Scarlett，名花有主的Scarlett實行冇佢哋咁好氣！

唔使捱眼瞓睇波

三人對於即將到來的世界盃均表示好期待，Keyman說：「球迷嘅心態就係上屆完咗就準備下屆，好似追劇咁，呢集唔開心會想等下一集可以有個完美結局。」身為英格蘭球迷的丹尼爾更搞笑說：「我自出娘胎已經準備緊！想睇英格蘭捧盃。」Scarlett就最期待今年終於不用捱眼瞓睇波，丹尼爾都十分認同：「個時間真係好Perfect，通常都係半夜之前，又可以隨時喺平板、電腦、手機或者電視度睇到波。」Keyman聞言就貼心地對Scarlett說：「我知你好早瞓，等我下次帶你睇港超，啲時間包保喺日頭，咁你就唔使怕眼瞓。」丹尼爾亦爭住說：「係我就帶Scarlett睇戲喇，點會帶女仔睇波o架？」Scarlett只好尷尬回應：「其實我最近真係好忙，我應該睇唔到咁多嘢喇！」一句說話就將兩男的提議推卻。

Keyman和丹尼爾作為專業評述員，又點會只掛住撩女仔，二人大方分享想講波講得好的秘訣，最重要日常生活多觀察，Keyman說：「生活要盡量充實，多啲同唔同朋友傾偈，講波就同生活一樣，要包羅萬有先有趣。」

Keyman（右）與丹尼爾未睇波先興奮，笑言最重要唔使捱眼瞓。	黃心美期待以4K高畫質(目及)靚仔球員。	節目及播映資料

高畫質零舍投入

出名鍾意講爛Gag的丹尼爾反而指雖然需要搞氣氛，但更重要的是投入：「一旦笠上個耳機就會進入到個專業嘅狀態，一定係要自己投入咗先，如果夾硬要求自己抽離同中立，反而會講得唔到肉，知道今年嘅賽事係全4K直播，咁高畫質一定可以睇得零舍投入。」Keyman亦說：「話說我屋企就係睇嗰啲矇查查舊式電視，睇到個賽果就算，依家4K我就有啲擔心，驚太高清自己會分心去咗第二度，惟有試下專心啲！」丹尼爾即取笑他說：「冇得唔試o架喇，今年講波一定係4Ko架喇，你享福罷喇！」Scarlett亦心心眼說：「係呀，今年我睇靚仔都開心啲！就好似我最愛嘅葡萄牙C朗拿度，可以望清楚佢個靚仔樣，真係諗起都興奮。」Keyman不忘潑冷水：「C朗嚟講呢，矇矇哋睇就真係成個雕像咁嘅，近睇嘅話好多雀斑喎，你介唔介意呀？」Scarlett反寸他說：「矇矇哋就睇番你個美斯喇，我嘅C朗係無懼高清o架！」

文：音樂組