Kary懷孕零走樣Stephy拒爆BB貴 "性"

準媽咪吳雨霏（Kary）前晚與好友鄧麗欣（Stephy）及區文詩（Angela）飯敍，還上載合照並留言：「The Best is yet to come」。相中的Kary化上淡妝，精神奕奕，完全沒因懷孕而走樣。席上，Angela突然送上蛋糕，賀Stephy入圍金像獎爭影后。事後，Kary分享吹蠟燭時的NG片段，三人忍不住哈哈大笑！

Stephy昨日到大潭出席慈善步行起步禮，坦言聚會前已很久沒見Kary：「佢好好，幸福滿面！佢都冇肥好多，係飽滿咗。（知道仔定女未？）你哋問番佢啦！（驚好似上次唔小心爆咗楊愛瑾佗B仔？）上次係冇心，真係唔知佢未講，但好彩嗰時佢都差唔多宣布，今次我就死都唔講！」

Stephy擔心重蹈覆轍，今次點都唔肯講Kary佗仔定女。

徐榮一家跟大隊示範做運動，女兒包包賣萌搶晒鏡！

希望有個契女

問到可有準備禮物？Stephy表示仍有時間，顏色方面就選中性的灰色，堅持不漏囗風，但自言已有兩契仔，希望有個契女。

提到11年前曾與主辦機構到孟加拉探訪，Stephy表示了解到當地的眼疾問題，透露以前近視但貪靚不想戴眼鏡，看不清黑板便看同學的筆記：「搞到好似出貓咁！人哋以為我好Cool唔睬人，其實我係見唔到佢。」同場的徐榮一家四口、童星楊鎧凝及鄭麗莎現身，徐榮表示緊張兒子的運動多於學業：「佢除咗球隊練波，我有捉佢去跑步，因為球員一場波要跑十幾公里。」又透露將於4月開辦教育中心。

文：音樂組

攝：林蔚恩