朱薰頓悟要贏先學識輸！
ViuTV製作的《闔家學術常識問答比賽》載譽歸來，今季繼續由朱薰姨夥拍新拍檔王貽興考考港孩，有神童港孩叻過虎爸虎媽，連怪獸家長都自愧不如，王貽興亦慨嘆港孩做了考試機器，朱薰則覺得現今的小朋友掛住讀書，失去童年，但通過比賽要讓孩子學識輸。
今季《闔家學術常識問答比賽II》由口才了得的朱薰夥拍才子王貽興擔任主持，每集會進行不同類型的問答環節比賽，所有題目以小四至小六的內容為主，包括中文、英文、數學、常識。今季參賽者有奧數神童、傳統名校的學生，更有參賽者每年橫掃多個校際朗誦節的獎項，闔家精英盡出，爭取總值超過港幣10萬元的獎金禮品。
一班參賽小朋友在節目中非常搶鏡，有小朋友大口氣表示奪冠冇難度，自負高傲，在運算10秒的數學問題，竟然秒速回答，亦有小朋友志在參與，更搞笑自稱靚仔，覺得最緊要開心，亦有細路未比賽已經心驚驚，在鏡頭面前爆喊話好大壓力！
家長畀默書考起
而一眾港孩的虎爸虎媽被節目問答內容考起，鏡頭前口啞啞，大嘆自愧不如。小朋友返學要默書是常識，輪到三位爸爸面對默書題，要寫出「窈窕淑女君子好逑」八個字，結果兩位爸爸都默不出來，在兒子面前認真失威！
主持人朱薰大讚小朋友好醒目，覺得節目最好睇是一眾小朋友與家長的關係，她笑說：「問答時小朋友都會諗，到底老竇、阿媽可唔可靠呢？有啲環節由小朋友話事做主，佢哋跟家長商量後，如果答錯咗有時佢哋會怪責父母，真係幾好睇幾好笑。」朱薰坦言節目中有些通識題目，連她都不識答，例如要家長默書，她說：「依家啲人幾耐冇寫字，大家篤手機多，真係唔識o架！」
唔識開汽水
育有一對仔女的朱薰笑言不是怪獸家長：「依家唔係，但好有潛質，因為我嘅性格好緊張。」問她可會考慮帶大仔一齊參加？她笑說：「佢未夠歲數，況且我個仔未必肯，我又唔會特別操佢。」主持這個節目最令朱薰有所覺悟，就是要讓小朋友學識輸：「上一輯見到有小朋友輸咗頂唔順喊，情緒唔好，可能依家啲小朋友太受保護，聽人讚得多，所以一輸就唔開心，要畀機會佢哋輸多啲，否則將來出社會佢哋會輸唔起。」
一班學童比賽時拚盡全力，甚至學業成績非常優秀，但日常的自理能力卻令人憂慮，節目中提供開瓶器、罐頭刀等工具，要求小朋友一分鐘內開支裝汽水，怎知班細路汽水就飲得多，但就未試過自己動手開汽水蓋。
朱薰從節目中學以致用，她說：「好似上一輯啲小朋友要打蛋，我返到屋企忍唔住叫個仔打蛋畀我睇，雖然佢唔識打，用手揸爆隻蛋，但至少佢夠膽試，結果嗰晚我哋食蒸水蛋，個仔上輯晚晚陪我睇，今季佢都會繼續捧場。」
《闔家學術常識問答比賽Ⅱ》
播映日期︰2018年3月5日起
播映時間︰逢星期一至五
晚上10時至10時30分
播映頻道︰ViuTV99台
文：音樂組