蕭正楠病到冇人理想翠如餵食藥
蕭正楠與黃翠如拍拖以來愛得甜蜜，不時隔空耍花槍。昨日他宣傳新劇時，投訴翠如出埠探訪，令抱恙在身的他沒人照顧，要爬入廚房煮食，認真慘情。
蕭正楠、湯洛雯（靚湯）及陳榮峻等昨日宣傳無綫新劇《翻生武林》，抱恙上陣的阿蕭透露近日忙拍另一套劇集《十二傳說》，由於經常到偏遠地取景，劇集要延至4月才完成。談到女友黃翠如近日外遊，阿蕭即投訴自己生病冇人理：「佢依家去咗孟加拉探訪，其實成個新年都冇乜見，亦未同佢父母拜年。翠如去山區照顧小朋友，倒不如留喺香港，都有個有需要嘅『兒童』佢要照顧，有個人斟水遞藥都好，我仲要爬去廚房煮嘢畀自己食。」
湯洛雯想收兵
提到有份參與的節目《公公出埠》添食，拍檔曹永廉獻計叫他上船造人，阿蕭笑說：「叫佢顧掂自己先，佢呢排生蛇，之前我生蛇佢笑我，呢排笑番佢。早幾日佢影咗張肉照我睇，原來佢個肚臍生蛇仲圍咗成個圈。（過廠探佢？）會傳染喎，等佢好番先，佢開緊《包青天再起風雲》，咁都要一路食住藥一路拍，起碼10日先好。」
同場的靚湯表示於劇中經常「收兵」，但現實生活未能如願。問到是否因有正印男友羅天宇所致？她笑稱：「可能係啦，不過呢排大家都忙，都好耐冇講嘢，又少時間見面，成日都係瞓得兩、三個鐘。（分手？）一直係發展中，我不嬲唔係感情大過天，好隨心，不過我對自己有信心。（掟男友入雪櫃？）擺住先啦！後生女要搏殺，咁公司又畀多咗機會我，佢都係，所以想做嘢為主。」
陳榮峻改夜晚擺酒
至於將在7月結婚的陳榮峻透露，原定4月底結婚，但因一些事才延期：「因為行禮當日係平日，估計觀禮人數唔多，所以應該取消下午酒會，改為晚上擺酒。擺幾多圍就未諗，但係就知道嗰段時間係淡季，好多酒樓都OK嘅。」
文：影視組