蘇志威搵動物傳心師激勵愛駒
歌手蘇志威名下愛駒「駿王」出賽以來經常包辦尾三，不過，昨日終於吐氣揚眉摘冠！原來蘇志威請來動物傳心師與愛駒溝通，令一直以為來度假的愛駒開竅發力比賽，蘇志威終嘗拉頭馬滋味，太太劉小慧更激動到喊。
「駿王」參賽以來一直表現麻麻，每次出賽多包辦尾三，早前更因前腳嚴重受傷而險提早退役，不過蘇志威依然對愛駒不離不棄，每次出賽定必全家捧場。近日牠成績突飛猛進，上場首次跑第二，昨日更大發神威，輕鬆跑第一。當愛駒衝線一刻，蘇志威全家都相當激動，尤其太太劉小慧既抱頭又大叫，還開心到喊，一大班人攬作一團慶祝。
「駿王」以為嚟度假
劉小慧坦言心情非常、非常開心，因為一直都當愛駒是囝囝，今次勝出就好似見到自己的兒子成功一樣。提到牠近期進步神速，她解釋：「老公一路都好信動物傳心術，所以佢都有搵個傳心師去同駿王傾偈。原來佢一路以為嚟香港只係度假，結果傾傾吓佢就開始知自己係嚟競賽，終於交出好表現。」小慧稱愛駒最喜歡其長女，而長女亦十分愛錫牠，她笑言：「就算蘇志威開演唱會，大女都唔請假，反而駿王每次出賽，佢都一定請假入場睇。」
黃婉曼生日收禮物
除了蘇志威愛駒跑出佳績外，前天氣女郎黃婉曼（Icy）有份的團體馬昨日亦跑第二，是愛駒最好成績的一次，加上昨日適逢Icy生日，喜上加喜，她說：「我生日前去咗探佢，同佢講我個生日願望係佢贏到第三名，我就好開心，但點知係第二名，真係超開心，仲要係同冠軍差好少，希望到我囡囡生日時，佢贏冠軍。」此外，還有歌手JW孖男友入場觀賽。
文：名人組