曲赤家有醒目狗速成扮死絕技
Rapper曲赤（K-CHEK）與女友黃雅斯（Szebi）養有一隻威爾斯哥基狗女「糖糖」，人狗相遇過程曲折，他說：「本來我就唔係『糖糖』嘅主人，話說幾年前Szebi有朋友去旅行，交咗『糖糖』畀我哋代為照顧一、兩個禮拜，我本身對哥基冇乜感覺，因為我比較鍾意雪橇同松鼠狗，甚至初初接觸『糖糖』嗰陣，我都唔覺佢得意！但係當我將佢歸還畀原主人後，唔知點解，我竟然好掛住佢喎，仲諗住買隻哥基返嚟養添！就喺呢個時間，神奇嘅事出現喇，『糖糖』嘅原主人話佢冇地方養，想將佢送畀我哋，就係咁，我就成為咗佢嘅新主人！」
曲赤被「糖糖」俘虜，大讚牠「狗全狗美」：「以『糖糖』作為一隻7歲嘅狗嚟講，連畀手、Sit，呢類基本動作都唔係好識，我有少少意外，於是慢慢教佢，點知佢唔只唔係蠢，仲係聰明狗，好快就做到晒啲動作，連『砰砰』中槍後瞓地都識！我都好鍾意同佢出街玩，帶佢落公園識男仔，又或者去可以攜同寵物去嘅商場行街，見到佢勁開心！雖然佢身長腳短，有啲似豬仔，但其實望落啲動作都好得意吖，其他狗狗開心就擺尾，佢就原地轉圈，真係超得意！」
