胡琳自誇喜劇泰斗夠癲喪
歌手胡琳唱功了得，演技亦不差，早前首拍無綫劇飾演賢妻，獲外界一致好評。外表斯文的她，揚言思想天馬行空，是一個癲喪之人，同時亦是喜劇泰斗，望有機會拍更多喜劇，顯露其真性情。
擁有一把靚聲的胡琳，原來在紐約讀電影學院畢業，但卻反而勇闖樂壇。早前首次參演電視劇《溏心風暴3》，將善良的嬌妻角色演得入型入格，好評如潮。問到最想挑戰哪類型角色？她說：「我覺得自己係喜劇泰斗，但冇人知，同埋其實我個人好癲喪，但癲喪嘅一面喺我做歌手時，被無限縮細咗，好想演呢類嘅戲。（點樣癲喪？）同我一齊上堂嘅同學或老師都會知道我係不受控，最記得老師講過，我呢個人一係喺精神病院出嚟，一係就係天才，可能我嘅思維比較天馬行空。」
操馬甲線開騷
至於唱歌方面，她表示五月將舉行演唱會，現將所有精力放在演唱會上，希望有新的一面給觀眾，她說：「上次演唱會比較靜態啲，今次希望比較動態，跳多啲舞，所以要不停操弗自己，依家搵咗私人教練，希望身形結實啲。（要操馬甲線？）練幾個月應該會有馬甲線出嚟，如果咁都冇，我會好傷心。不過我更希望背脊有好嘅線條，對我嚟講最性感嘅部分喺背脊，希望到時有個充滿美感嘅背脊畀大家睇。」
文：名人組
場地：東來順（帝苑酒店）
化妝：Krisie Wong