高海寧擔正壓力大再現鬼剃頭！
藝人高海寧在網絡電影中首次孭飛女主角，壓力大得令她再度出現「鬼剃頭」，拍攝時更跌傷「尾龍骨」。不過，新片上映後獲同行讚賞演技進步，特別是宣萱窩心說話令她相信自己有能力當女主角，高海寧說：「我一定得。」
入行十年的高海寧在正上映的馬來西亞網絡電影《福二代》首嘗女主角滋味，朋友及同行看過她的處女作大讚演技進步。在劇集《不懂撒嬌的女人》中合作過的宣萱寫了一大段鼓勵說話打氣，高海寧說：「宣萱好戥我開心，叫我畀多啲信心自己，話畀人聽我係得嘅。拍《不》佢見我冇信心，佢希望有人畀機會證明我係做到女主角，我唔會再懷疑自己，會話畀自己聽我一定得。」
「五蚊銀咁大」
高海寧拍戲時壓力大得令她感到無所適從，更出現「鬼剃頭」甩頭髮情況，惟有將壓力變成動力：「機會只得一次，唔知仲有冇下次，要好好珍惜機會。」這次是她第二次出現「鬼剃頭」，今次卻淡定得多：「後尾枕有兩個地方有五蚊銀咁大嘅位置甩頭髮，睇咗醫生話我壓力大，叫我放鬆心情，今次冇理，反正身體好番就會生番頭髮。」
跌傷尾龍骨
除了甩頭髮，高海寧親身上陣拍攝動作戲時，更弄傷腰骨至今仍隱隱作痛，慶幸醫生指不會影響生BB，她說：「有場戲要孭起鄭敬基跑，我用盡所有氣力，孭起佢又跌低，一Take過拍完之後攤咗喺馬路郁唔到，返酒店發覺尾龍骨隱隱作痛。」
在片中飾演「變態」富二代的高海寧，行為驕橫霸道，不可一世，她說：「因為缺乏家庭溫暖，角色有啲變態，鍾意折磨人，未試過做咁有發揮嘅角色。」此外，電影將會參加各地影展，稍後亦有機會在港上映。
採：影視組
攝：張福宏