未婚夫玩驚喜卓韻芝險掉求婚鑽戒
藝人卓韻芝去年宣布「出櫃」，上周推出新書卻自爆婚訊，與圈外男友拍拖首天便秒速答應求婚，人如其書般「峰迴路轉」。公開婚訊後阿芝前日首度現身接受訪問，她說：「人生有啲事係估唔到。（覺唔覺好衝動？）朋友話齋，冇衝動係成唔到婚姻，好多人拍好耐拖點解結唔成婚？就係差嗰下小衝動，何況喺卓韻芝身上乜都可以發生。」
當日阿芝在電話中被求婚，而被稱「閃電俠」的未婚夫則趁情人節給她補送求婚鑽戒，過程甚有心思，阿芝說：「情人節嗰晚送咗隻野餐用嘅杯畀我，我多謝完就放低咗，之後佢話落街買番石榴汁，我都不為意，到我攞隻杯嚟洗，將杯入面張紙拎起先見到個盒，盒入面係隻戒指。好彩咋！我仲諗住攞起隻杯就將紙掉落垃圾桶！但根據佢所講係計劃之中，因佢講過要出其不意下求婚。」阿芝不禁讚未婚夫「犀利」，知她「大頭蝦」可能會遺失戒指，故將戒指穿在頸鏈上，讓她「日掛夜掛」。
驚生「黑眼圈BB」
問到婚期，阿芝表示是今年，但日子及一切未定，唯一共識是不會太多細節，但會開Party與親友分享喜悅。問到是否隨時準備「造人」？她說：「呢個要Plan，因為同身體狀況有關，即係如果趕緊寫書通宵唔瞓，咁對佗住嘅BB健康都唔好，一陣生出嚟『黑眼圈』咁就唔好喇！」
文：音樂組
攝：劉智源
髮型：Sam pan@Muse Hair
化妝：Shuen Kong
服裝：One And Two