陳凱琳密冚婚訊
無綫小花陳嘉寶與賴慰玲去年升呢成為人妻，組織幸福家庭，新春期間相約好姊妹陳凱琳聚會，各人都攜眷出席。首年派利是的陳嘉寶和賴慰玲依照傳統派雙封，未婚的鄭嘉穎和陳凱琳收利是時笑到見牙唔見眼。而鄭嘉穎抱着賴慰玲兒子時盡顯父愛，不少網民都向他催婚，想他和女友陳凱琳盡快結婚，派利是給賴慰玲的兒子！
陳凱琳昨晚穿上低胸晚裝露出兩吋事業線出席晚宴，提到與男友團拜，她說：「本身唔想Po相，但見個個都Po。」問到明年是否到她派利是？她甜笑擰頭說：「順其自然，未有計劃，到時都會低調。（麥玲玲話你分分鐘註咗冊？）有留意，佢仲話我見到佢可能會打佢，我真係會o架，講呢啲會令人誤會囉！（將來結咗婚都唔公布？）真係有諗過，呢幾年我哋關係好受注目，所以會低調。結咗婚先講，或者喺外地行禮後註冊會明智啲。」