袁偉豪見家長提親 張寶兒冧爆：好事近！

型男袁偉豪與港姐出身的張寶兒，去年5月拍攝無綫旅遊節目《打工捱世界Ⅱ》時火速撻着，雖然相戀不足一年，但愛得甜蜜，早前被問及結婚計劃時，Ben曾說：「唔排除任何可能性。（接受先有B後結婚？）睇到時有冇呢個Feel囉！當然都要尊重寶兒家人。」早已認定Bowie為結婚對象！

斟茶遞水 主動埋單

適逢新春佳節，Ben前日專誠與女友去中環見家長。當日下午四時許，他驅車前往女友位於將軍澳的寓所，在香閨逗留個多小時後才載女友直駛中環，兩人落車時見到記者亦笑笑口。問到是否趕往見家長傾婚事？Ben尷尬地說：「拜年啫！」問到Bowie是否好事近時，她即風騷笑說：「我哋每一日都好事近，每一日都充滿幸運！」之後兩人去商場行電器店，未幾見Bowie的父母及弟弟前來會合，期間Ben與女友的父母有傾有講，又齊齊研究音響等電器，一行人之後拉隊往附近食肆晚膳。席上見Ben融入家中，與未來外父外母傾到笑笑口，體貼的他又不時為他們斟茶遞水，逗留個多小時後主動埋單，之後與女友先行離開往取車。Bowie的父母步出食肆時面帶笑容，問是否很滿意未來女婿？他們起初笑而不答，再問張母覺得Ben值幾多分？她即四萬咁口說：「100分！」

Bowie的父母步出餐廳時笑容滿面，對Ben有讚冇彈！	袁偉豪與Bowie的家人相談甚歡。	袁偉豪對Bowie關懷備至，氹得女友笑不停。

睇電器研究音響

Bowie事後接受本報訪問，透露近日家中裝修，故男友與其家人相約行街選購電器，順便畀意見。問到父親跟Ben平日是否都很投契？她笑言：「大家都知佢對生活品味不嬲都好講究啦，都係傾啲音響嘢，大家溝通吓啫！大家行到夜咪一齊食飯囉，冇話專登約定。 （屋企人對Ben好滿意？）佢哋好多嘢都由得我，見我事業、生活各樣都好，都好開心。（父母有冇催婚？趕做狗年新娘？）呢啲隨緣啦！」而Ben受訪時表示：「我幫佢哋選擇一啲家庭電器同拜年，我哋好好，多謝大家關心。」

放大圖片	袁偉豪同女友研究音響，又陪她的家人揀電器。

文、攝：追蹤組