黃又南操到「不舉」挑戰十舊腹肌
組合Shine近日為3月2及3日在紅館舉行的「SHINE MOMENT Live 2018」演唱會，密密練歌並瘋狂操肌，以往予人「孱仔」形象的黃又南更練成「爆肌麒麟臂」，自爆搞到半夜抽筋「不舉」：「用咗半年時間不停操練，記得頭三日係最辛苦，瞓覺都會抽筋扎醒，連手都舉唔起！」
而Shine昨日於青衣出席新戲院開幕活動，二人表示綵排已進入倒數階段，提到又南為演唱會操得一身肌肉，他自言已30多歲：「再老啲驚體能操唔到咁勁，所以留番美好回憶。」問到現時有多少舊腹肌？他說：「六舊一定有，向十舊挑戰！」又即場除衫大騷「老鼠仔」，而徐天佑則表示留待演唱會才大騷健身成果。
