任達華開條件拍劇有得傾

任達華、唐詩詠、方力申、王菀之、姜皓文、莊思明及麥子樂，昨日到將軍澳電視城宣傳英皇電影《我的情敵女婿》，在餐廳派揮春及魚蝦蟹，吸引大批TVB員工包圍及要求合照！任達華表示已很久沒去將軍澳電視城，今次再來勾起40年前首次拍劇的回憶，亦心郁郁想再拍劇：「好鍾意拍劇，四個月喺埋一齊，好似大家庭咁，好開心！（想再拍劇？）今年可以考慮。（咩題材？）最想演警察，多啲矛盾。（識唔識依家啲花旦？）佢哋好叻o架，有好多好演員。（依家識邊個新人？）胡定欣，幾好呀！（佢唔新喇！）我知！咁每年有新港姐、華姐，我唔介意帶新人，咁先可以令行業更好，華姐出身有好處，表現自然啲。」

教唐詩詠學曳

他表示目前未與TVB高層傾過想再拍劇的想法，若然成事，相信可以安排到時間。問到有甚麼條件？他說：「休息時間當然要夠，咁先夠活力，每日至少要10小時休息！（唔講錢？）都要求呀，我貴o架！以前拍劇賺唔番，希望賺到買到樓，講笑啫！感情最重要，仲有劇本，有時同新導演合作，我都只係拎封利是仔。」問到農曆新年會否出埠？他表示聖誕去了零下40度低溫的芬蘭，計劃新年與妻女去有40度高溫的熱帶地方。

點名讚胡定欣。	眾演員殺入電視城派揮春造勢，夠晒熱鬧！	方力申同詩詠埋身向食客宣傳新片。

唐詩詠表示難得影帝任達華再臨電視城，問到拍攝時有否請教前輩？她說：「佢叫我曳啲。（點曳法？）自己諗新嘢，唔使成日跟足劇本。」小方即指詩詠已榮升視后，有資格「曳」，詩詠說：「未得，我哋唔會成日改嘢，不過都係睇對手，之前同王浩信有加啲動態嘅嘢，但唔係改對白。」小方又指曾遇過某男女主角帶編劇到場，即場改劇本。詩詠透露片中飾演任達華助手，與姜皓文是一對：「角色正經啲，其實我都想搞吓笑，見佢哋玩得好開心。」

唐詩詠獲任達華提醒要「學曳」。	任達華捧起碟燒味飯，莫非好想食番啖？	姜皓文黐實財神，新一年肯定發財！

劉嘉玲出場有陣風

此外，王菀之透露片中有不少搞笑演出，要扮鬼、4歲小孩及賭神，最難忘是與影后劉嘉玲有對手戲：「佢飾演我後母，佢拍喜劇好叻，我有偷到師，同埋佢行出嚟係有陣風，有股氣場。佢好靚好專業，我對眼離唔開佢！」今次已是第3年拍賀歲片的她，覺得賀歲片是香港人傳統，很開心能參與其中散播歡樂。她又表示與導演葉念琛合作膳食很好：「好多蛋糕同掃街小食。（肥咗？）都冇乜差別。」

文：影視組