麥明詩飛奔慳番牛肉乾
港姐冠軍麥明詩與藝人余香凝（Jennifer）昨日無懼寒冷天氣，衣衫單薄現身珠寶品牌周生生《StateYourStyle Tour》開幕活動，提到第一件收到的首飾，麥明詩說：「係媽咪送嘅耳環，不過隔咗一陣就唔見咗，買之前媽咪已經問我係咪唔會唔見，我唔想畀佢睇死，所以買番對一模一樣嘅耳環！」又提醒男士們：「如果送首飾畀我就送耳環，因為易襯又可將焦點放喺個樣度，我又冇身材。」
至於Jennifer指首飾對她有鼓勵作用，她解釋：「上年男友（陳家樂）送咗隻鑽戒畀我，唔係求婚，佢係想我硬淨啲，因為當時我發生車禍好唔開心，又擔心會毀容。」並透露與男友及母親剛從泰國旅行返港，直言媽咪對男友評價很好，問到婚期？她說：「30歲先，因為結婚就預生埋仔。」
另外，麥明詩活動後駕車到中環歌賦街搵食，將座駕停泊在路邊。本來想食馳名牛腩麵的她，因麵店大排長龍，與助手轉陣，改為食拉麵醫肚。約1小時後，有警員驅趕違例泊車兼抄牌，幸好麥明詩剛好醫飽肚步出，見警員站在座駕前眼望望，她即急急腳飛奔取車，成功避過抄牌，慳番320元罰款！