張繼聰破冰未成照慶功
演員張繼聰因經理人公司與無綫對簿公堂，最近絕迹無綫，前晚卻現身劇集《誇世代》慶功宴。阿聰表示並非成功「破冰」，公司之間的問題還未解決：「今次係私底下食飯慶祝，冇特別影響。」
無綫劇集《誇世代》演員歐陽震華、陳豪、張繼聰、邵美琪、江美儀、麥明詩、莊思敏及高層曾勵珍等台前幕後，前晚在尖沙咀為劇集在《萬千星輝頒獎典禮2017》奪得壓軸大獎「最佳劇集」舉行慶功宴。張繼聰最近因經理人公司與無綫鬧官司而絕迹無綫，問到突然現身，是否已經「破冰」？他說：「唔係破冰，公司同公司嘅問題未解決，但係唔影響慶功，個個都叫我嚟，套劇大家好畀心機拍，攞到『最佳劇集』獎大家都好開心。我只係暫時唔可以喺TVB亮相、宣傳，今次係私底下食飯慶祝，冇特別影響。」
陳豪渴求發展機會
阿聰坦言未能出席頒獎禮齊齊攞獎，固然可惜，但自嘲經常「食白果」，今次或許是因為他缺席頒獎禮，劇集才可獲獎。他又力撐無綫台前幕後都不是求其做，有心拍好作品的大有人在，《誇》劇得獎絕對是一個鼓舞。
有傳陳豪約滿無綫後有意離巢，到內地拍劇賺人民幣，陳豪表示未有對現時酬勞感不滿：「合約仲有一段時間，差唔多要傾。或者掉番轉由演員角度去講，拍咗咁多年劇，係想有唔同發展，唔係特別話想離巢，做演員都係想尋求更多發展機會。」
歐陽震華操「鯨魚線」
至於歐陽震華最近在內地完成舞台劇演出，提到萬綺雯爆料指計劃一同操出馬甲線及人魚線，歐陽震華笑說：「Otto（陳志健）成日引我，但我驚忍唔到口！（想操到張繼聰、陳豪咁樣？）我發噏風話依家有條『鯨魚線』，想操到有條人魚線，過埋年先，等我食多幾底蘿蔔糕先！Otto拍心口話半年時間冇理由唔得，我話係我唔得呀，哈哈！」
而邵美琪提到當年劇集《我本善良》最近深夜重播，她說：「睇番都幾得意，已經28年前，諗起好多去英國拍外景嘅片段，好似『發瘟』（指溫兆倫）整蠱啲狗嘅趣事，都有用微信搵佢。」
文：影視組