貝安琪被「電燈膽」打瘀塊面

貝安琪（Ankie）昨日出席護膚品牌活動，透露兒子一歲生日，會買鞦韆作禮物：「佢平時喺公園見到鞦韆就發晒癲，見人玩緊都想搶，不停大叫，不過都會教佢要排隊。佢最鍾意我同爹哋同佢玩，瞓覺都要瞓中間。（做電燈膽？）係，但遲啲要返自己房瞓，因為我哋成日被佢整親，試過畀佢打到塊面瘀咗。」雖然近日天氣寒冷，但Ankie透露日前還着比堅尼拍廣告：「凍到震，好彩冇病。」另又透露農曆新年會留港，故早前飛德國探親亦希望囝囝學多啲德文：「平時都會同佢講德文。（大啲返德國住？）唔一定，我都想佢學好廣東話。」