鍾欣潼拍拖半年晒鑽戒閃爆婚訊

前晚阿嬌在社交網上傳左手無名指戴上巨鑽的相片，並留言：「下一站幸福。」Sweet爆宣布已答應與拍拖半年、有「醫界王陽明」之稱的男友賴弘國求婚，榮升準賴太，令全城哄動！阿嬌與舊愛韓男權寧一結束戀情後Dry足四年，去年10月被揭與32歲的靚仔醫生賴弘國展開「姊弟戀」，其後雙方大方認愛，但賴弘國被揭曾結婚，二人拍拖後更被踢爆男方與G奶「老婆」Wendy過從甚密，令「嬌粉」大為緊張！對於男友情史，阿嬌百分百信任，兩人穩定交往，到上周阿嬌37歲生日當日，原來男友已秘密求婚！

屋企跪地求婚

昨晚阿嬌現身灣仔出席影后惠英紅的生日會，在記者會上接受大家的祝福並分享喜悅，她在原定時間40分鐘後，春風滿面亮相，但被要求晒婚戒時，她即騷出十隻手指說：「我都冇戴！」問到是否已求婚成功？阿嬌冧爆說：「應該係啦！戴咗戒指應該都係啦！（幾時求婚？）我生日求嘅。」問到求婚細節，阿嬌即交個波給未婚夫：「想到時帶佢出嚟畀大家識，佢自己再同大家講。（有講愛的宣言？）有，等佢自己講。（幾時帶出嚟？）你想幾時？佢依家好『污歪』。（另一半喺邊？）冇約佢，冇邀請佢出嚟。」

鍾欣潼	阿嬌在網上晒巨鑽求婚戒指，昨晚現身時卻兩手空空。	阿嬌與賴弘國「姊弟戀」修成正果。

當再追問求婚過程，阿嬌透露在家中求婚：「好激動，因為係人生大事，想公布之前諗咗一段時間，行呢一步真係需要勇氣，公布完後係心跳加快。（跪地求婚？）佢有跪地，係應該嘅。（驚喜落淚？）又冇喊，但尋日網上宣布時塊面紅晒，冇試過咁緊張，都紅咗幾個鐘頭，冇酒嗰啲，塊面好(慶)又好緊張，心跳好快！（拍咗幾耐拖？）其實唔耐，半年度。（咩原因令你願意託付終生？）當然有佢價值啦！佢對我好好，我覺得係對嘅時間遇到對嘅人。」問到是否已有婚期？她說：「啱啱先求，有排！（有計劃未？）未Plan，太突然，好多嘢要諗清楚啲。（2018年結婚？）我知道一定會話畀大家知。」

「我希望生BB嘅」

問賴弘國最令她感動的原因？阿嬌說：「肯包容我所有壞習慣，一開始就話晒佢聽，所有壞嘅騷晒佢睇，接受到就接啦，佢就照單全收，呢樣好重要，我唔係一個假嘅人，唔會包裝自己，我將所有衰嘅壞習慣都畀晒佢睇。（有咩壞習慣？）懶囉，懶得好誇張，佢做晒所有嘢，最重要係異地戀，佢肯維繫，我哋唔係成日可以見，佢都明白，佢安排到就盡量配合。（家人知道？）事前知道，佢爸爸我有見過，新年會去拜訪媽媽。（家長催婚？）有催，大家都係要Plan，希望Plan好啲，可以有美好回憶，都好想分享我喜悅。（想婚禮係點？）我又真係好懶，好攰(口架)嘛，到時先算，咩都未有計劃。」被問是否雙喜臨門？阿嬌想一想，未有直接回答，只說：「吓，我5月有演唱會，有三場，大住個肚呀？」再問會否生BB？她說：「應該，但未知幾時結婚，我希望生BB嘅！」

「你條仔正喎！」

問到未來老公值幾分？阿嬌冧爆說：「可以話超過100分！（佢睇緊直播？）我都唔知有直播。（幾時帶佢出嚟介紹？）諗一個適當嘅時候，到時約個時間啦！（有通知公司？）公司Mani（經理人霍汶希）、老闆（楊受成）佢哋知，佢仲第一次同我講『你條仔正喎！』」

至於準人夫賴弘國昨親自回應說：「因為我不是藝人，希望低調點，我會在自己事業上努力，給予阿嬌最大的幸福，也希望大家能給我們送上祝福！謝謝！」

文：影視組